Ecuador chhim lama lung inah mi tang 31 vel thia hmuh an ni a, an zinga 27 phei chu inawk hluma hmuh an ni tih thuneituten an sawi.
Pathianni khaw var hmaa Machala khawpuia lung in, El Oro-a mi sual pawl (gang) pahnih intibuaiah mi pali vel thah niin 30 chuang an inhliam a ni.
A hnu darkar eng emaw zatah venhim hna thawktuten building chhawng thumnaah gang intihbuaina dang a chhuak leh tih hriaa ngaihventute chuan inawk hlum hi an hmu ta niin Ecuador-a prison service chuan an sawi.
Ecuador-ah hian an tan inte hi a tawt em em a, a chhungah hian gang inhal tak takte hi an intibuai a, tharum thawhna nasa tak tak thlengin tun hnaiah mi thahnem tak an lo thi tawh.
Prison service, Snai tia an sawite chuan tun hnaiah lung in sak tharah tang thenkhat sawn tumna a awm mek laiin hetiang buaina hi a chhuak tih an sawi.
El Oro lung inah hian September thla khan gang intihbuaina lian tak chhuak tawhin mi tang 13 leh vengtu pakhat an thi.
Lung in tang chhungte chuan tan in chhungah venhimna tha zawk pe turin thuneitute an phut thin a, gang inhal zualte phei chu tan in hrana dah pawh an duh a. Machala-ah hian mi chengte chuan an khawpui laili taka lung in awm chu hmun danga sawn turin thuneitute an ngen ve reng bawk.
Kumin kum tirah khan President Daniel Noboa-a kaihhruai sorkar chuan Santa Elena province-ah tan in venhimna tha thei ang ber awmna sak a nih dawn thu an puang.
Lung in thar hi El Encuentro tih niin November thla tawpa hawn tura ruahman a ni a. Interior minister, chuan tangten himna an dawn pawh a that zawk sawt tur thu a sawi.
Lung ina gang intibuaihna hi tun hnaiah Ecuador-ah hian a thleng tam hle a. Pawl zinga pahnih, Los Lobos leh Los Choneros bik phei chu September thla khan US Department of State chuan Foreign Terrorist Organisation (FTO)-ah a puang a ni.