Aizawl: Kolkata-a Manipal Hospital EM Bypass chuan Aizawlah hriselna chungchang leh Cardiopulmonary Resuscitation (CPR) tih dan zirtirna hun a buatsaih.
Ram chhunga natna tlangthang tak, Cardiac arrest avanga mi tam takin nunna an chan thin tihtlem anih theih nan leh hemi kawnga invenna turin Kolkata-a Manipal Hospital EM Bypass chuan an beihpui thlakna ‘Anveshana – Medical Education for Media’ kaltlangin CPR tihdan chu Thawhtanni zan khan Hotel Regency, Aizawlah a buatsaih a, hetah hian damdawi lama mithiam tak tak te chuan chanchinbumite chu CPR tihdan zirtirin, CPR tihdan phung diktak hmangin cardiac arrest nei damlo chu minute 18 chhunga chhanchhuah theih dan tur an zir tir a ni.
Manipal doctor Dr. Raja Mazumder sawi danin, cardiac arrest hi minute 30-ah damdawi in thlenpui ngei a tha tih thin anih avangin, hmun hla leh damdawi in hnaih ve lo tan kawng a harsa thin hle a, hemi harsatna sutkianna turin CPR tihdan an zirtir thin tih sawiin, hei hian nunna tam tak a chhanchhuah an beisei tih an sawi.
Dr. Raja Mazumder pawhin, cardiac arrest chu mitinah awm thei anih avangin, inven thiam a pawimawh a. Hemi kawngah hian hun a pawimawh tih sawiin, hun tlem te neih chu hman thiam a pawimawh hle tih a sawi a. CPR thiamna chuan nunna a chhanhim thei tih sawiin, damdawi in pan remchang lo tan a tangkai thu leh hemi kawngah mipui zirtir a pawimawh thu a sawi bawk.
He huna chanchinbumi telte chuan training session hi an chhim a, training te hian CPR Training certificate dawngin, heng bakah hian Manipal Hospital EM Bypass, Kolkata-a Health Card an dawng bawk a. Hei hi ram chhunga Manipal damdawi in hrang hrangah a hman tangkai theih dawn a, Mizoram nena thlunzawm an duhna leh mipuite chu hriselna tha zawk pek an duhna lian tak hmangin Manipal damdawi in hian theihtawp a chhuah zel tih an sawi.