Kan hmuh leh hriat angin Aizawl khawpui kawtthler hi zan lamah a thim em em a, India ram state capital ni ve siah chuan a thim ber ang a tih theih awm e. Mi state-ah hi chuan an khawpui kawtthler hi thim tak lai hmuh tur a awm meuh lo.
Khawpui changkang, a him leh him loh tehnaah pawh zan lamah khawpui chhung kawtthlerte chu mi vantlang tan a eng em, misual tawn mai hlauhawm khawpin a thim em tihte a ni thin. He tehnaah hi chuan mi naran pawhin hai rual lohin kan khawpui hi teh san dan a awm miah lo a ni.
Kan khawpui vengtin leh kawtthler tin hi chu tih en uar a har ang. Amaherawh chu kan khawpui kawtthler pui ber Bawngkawn atanga Kulikawn te tal hi chu tih en ve theih tur a ni. Hman atangin a thim tawh a, tunah pawh a eng chuang lova. Kan khawpui hian faina lamah hma a sawn kan tih mek lai hian kawtthler zan lam eng hi chuan hmasawnna pakhatmah a nei lo a ni. Kum tam tak kal tawha kan dinhmun atang khan a ngai kan la ni a, hman aia a en zawk tawhna awmchhun chu dawr neituten hman aiin tunah hian sign board eng thei te an uar ta deuh a, zan lama an dawr him zawk nan light an vuah tam ta deuh a tih zawng a ni. Tlemin kawtthler a ti eng deuh.
Khawpui hmasawn nan municipal council kan din a, a la chak tawk love tiin municipal corporation (AMC) ah kan hlang chho leh a, corporation power nei sang zawkah pawh kan thim tho.
Kan corporation hian khawpui ti eng tur hian pawisa an nei lo nge tih hriat a chakawm khawp mai. Mipuiin khawpui hmasawn nana chhiah kan chawite hi corporation hian a ei ral mai mai niin a lang. Pawisa awmchhun pawh mipui tana tangkai lem lo hna eng eng emaw phuahchawp a, politics a induhsak nan an hmang ral mai mai ni a lanna a tam khawp mai.
Kumthar maiah hian AMC member kan thlang leh dawn a, party ten corporation-ah sawrkarna chan tumin an inbei leh dawn. Party tin hian khawpui kawtthler ti eng tura an intiam beisei ila, helama hmasawn thei tura inzuar ngam party awm se a tha hle ang. An sawrkar chuan khawpui kawtthlerte ti eng ngei bawk sela.