Aizawl: LESDE Minister Lalnghinglova chuan labour kaihhnawihah state/UT hrang hrang dinhmun a inan loh theih avangin dan hnuaiah state zawng zawng hrut rual vek lovin an mamawhna mila herrem theih dan zawn a pawimawh tih a sawi.
Ni hnih awh tur, ‘National Conference of Labour & Employment and Industry Ministers & Secretaries of State/UT Governments’ chu khan Bharat Mandapam, New Delhi-ah tan a ni a, Mizoram aiawhin LESDE minister a tel.
India rama Labour & Employment leh Industries minister leh secretary-te inkhawmpui hi Ministry of Labour & Employment (MoLE) buatsaih niin, Union Labour & Employment Minister Dr. Mansukh Mandaviya leh Union Minister of State Shobha Karandlaje ten an telpui.
He hunah hian LESDE Minister Lalnghinglova Hmar chuan thu sawiin, “Labour & employment ministry hmalakna kaltlanga hna thar kan siam belh rualin hnathawktu tha siam belh a ngai. Chumi tur chuan chak zawka skill development kalpui tel a ngai a ni,” a ti.
Labour kaihhnawihah state/UT hrang hrang dinhmun a inang lo thei hle tih sawiin, “Keini’n a sang bia thil kan sawi laiin a then chuan a nuai bi, a vaibelchhe bi ten an sawi. Kan hmalak theih chin leh kan mamawh a inchen lo a, dan hnuaiah state zawng zawng hrutrual vek lovin kan mamawhna mila herrem theih dan zawn a pawimawh a ni,” a ti bawk.
Lalnghinglova Hmar chuan LESDE Department kal tlangin Mizo thalai eng emaw zat Japan leh ram dangah hnathawk turin an kal tawh tih a sawi a. Tawng zir tura Delhi pan a ngai thin chu thil hautak tak a nih avangin, Mizoram chhung emaw hmar chhak lamah tawng zirna hawng turin rawtna a thlen a ni.