Aizawl: Prime Minister Employment Generation Programme (PMEGP) hnuaia loan late tana ni 10 awh tur training, ‘Entrepreneurship Development Programme (EDP)’ tih chu Mizoram KVI Board Chairman C. Lalremliana’n Thawhlehni khan a hawng.
Zemabawka MDTC Complex-a hawnna inkhawmah C. Lalremliana chuan, entrepreneur chu mahni kea ding thei tura kawng engkima hma la tura pen chhuak ngam, an thil tih a hlawk theih dan turte, harsatna awm thei leh chhiatpui der theih dan tur te ngaihtuah lawk veka hlawhtlin tuma hma la ngamte hi an ni a. Hetiang dinhmuna ding an ni tih hrerenga fimkhur leh uluk taka hmalak a ngaih avangin, kalphung nei taka a kal theih nan Entrepreneurship Development Programme hi buatsaih a nih thu a sawi.
PMEGP hnuaiah Entrepreneurship Development Programme hi tih ngei ngei tur (mandatory) a ni tih sawiin C Lalremliana chuan, “A chhan chu, diltu tam zawk hi an thil tih tur chinchang ngaihtuah thuk lem lova ti ve mai, mi tih hriaa ti ve mai kan ni tlangpui a. Chuvangin, PMEGP Scheme hlawhtling taka a kal theih nan, kawng inkawhhmuh nan he programme hi buatsaih a ni,” a ti.
C Lalremliana chuan, “He loan hi mi tam takin an lo la tawh a. Hun kal tawhah he loan latu, hma la tha, din chhuahpui an awm tawh laiin, hma la tha lo leh ti tak tak lo, an trade thlan ang leh a nihna tur tak anga hmang lo, thil danga lo hmang, loan pawh rul tha thei lo te an lo awm tawh thin a. Keini chuan ti tak tak tur leh a nihna ang taka tha taka hma la turte chauh pek kan duh avangin uluk takin kan en zui zel dawn a ni,” a ti bawk.