- Rinfela Zadeng
Biak in thenkhatah chuan Krismas hla sak ri hriat tur a awm tan tawh a, he hun Sikpui Krismas hian mihring nunah thu a sawi a nih hi tiraw u? Thlarau lam leh tisa thil pawhin mihring nunah nghawng lian tak a nei a, a hlutzia hi thu leh hlaa puan chhuah zawh sen loh a ni awm e.
- Mizote leh Krismas
Kristian Sakhaw betu kan nih hma chuan Sikpui hi a hâng tawpin kan tuar chhuak thin a, Kristian Sakhaw betu kan nih hnuah erawh chuan Sikpui Krismas hi uar taka hmang nasa pawl hnam kan ni ve awm e. Kan hlaphuah thiamte pawhin Krismas lam hawi Pathian chawimawina hla, khuang hnih leh Solfaa sak chi te nalh tak takin an phuah a. Kum 2000 hmalamah te ngat phei kha chuan Mizoram khawtinah Krismas Zaikhawm avanga tlaivar thak thak hi sawi tur an awm âwm e.
Lengzêm leh Lênglâwng phuah thiamte pawhin heti lam hawi Krismas hla lungkuai tak tak an phuah chhuak a. A rik theihna zawng zawngah a ri emaw tiin Krismas hla lênglâwng leh lêngzêm hla nalh tak tak te chuan Sikpui a lo intan atangin Mizoram a tuam ti ila kan sawisual awm lo e. A huhoin hlim taka ruai kan han theh ho dur dur maite hi Mizote Sikpui Krismas hman dan tur dik tak a ni awm e.
- Sikpui Krismas-in a nghawng chhuah te
Sikpui Krismas lo awm chhan hi sawi nawn ngai loin kan hre vek awm e. Pathian meuh si kha keini min chhandam nan mihringah a lo chang rup mai a nih hi. Chu chuan nghawng nasa tak a nei a, a hria apiangin ropui kan ti a nih hi. Khawchhak atangin mi fingte an lo kal a, an robawm te hawngin pindan chungnung pawh chang pha lo khawpa a pianna tlawm Lal Isua Krista kha chibai buka thilpek pe turin an hna tul tam tak kalsanin kum vei meuhin an lo kal a nih kha. Hemi te hian Isua Pathianna/divine pawh hi an hriat kher a rinawm loh a, anmahni pawh hi Pathian betu pawh an ni kher lo ang. Chuti chung chuan Sikpui Krismas hian an nunah thu a sawi tlat si a nih kha.
Eizawnna hniam tak nei, uluk taka ven ngai leh kalbosan mai mai theih loh Beram vengtute pawh khan Isua lo piang, Sikpui Krismas a taka lo thleng kha hmuh ngei an duh a. An eizawnna leh engkim tuar huamin Isua Krista kha chibai buk turin a zan a zanin an va kal nghal a nih kha. Vantrihkohte thusawi an hriat zawh rual rual khan muangchang tawh loin Sikpui Krismas thlenna hmun Bethehem an pan nghal chûk chûk mai a nih kha. Beram Vengtute hi an awmna a hla deuh a ni ang – zanah pawh Isua hmu tura an chhuah nghal rum rum danah hian.
Lal Hreoda erawh chuan Sikpui Krismas hi tharum nen a hmachhawn mauh mai a. Pawisawi lo naupang leh nausen tam takin an tawrh phah a, Sikpui Krismas hmang nuam lo ber leh hmuak thiam lo ber a ni awm e. Chuvangin Heroda anga Sikpui Krismas hman hmangtu nih ve loh hi kan tum tlat tur a ni.
- A hlu ber chatuan nunna
Mihring hian a tawp bera kan hlauh tak tak chu thihna hi a ni awm e. Ni e, khawvel hi mi damte khawvel a ni miau a, thihna chuan hlutna a nei tawh loin awmzia a nei thei tawh lo thin. Chutianga chatuana mihring boral turte tana nun bul lo intanna chu Sikpui Krismas hi a ni tlat mai. Khawvel leh a piah lam thlenga chatuana nunna kan neih tanna tura Sikpui Krismas kan bula a lo thleng ta mai hi a hlu em a. Mi tu pawhin a thiam dan dan leh a phak ang tawka Sikpui Krismas avanga Pathian a lo fak ve hi a dem awm loh.
Keini Mizote ngei pawhin Mizo kan nih tirh atanga kan hnam nuna bet sa emaw tih tur khawpa Sikpui Krismas hlut em em hnam kan lo ni ta hi a lawmawm ngawt mai. Sikpui Krismas hlutna chang hre lo, Zaikhawm nachang hre lo, ruai nena lawmna chang hre lo ram leh hnam lo ni ta ila kan vanduai hle zawk awm e.
Thingtlang naupang harsa ve tak te, fate tan pawha kawrmawi leina tur nei lo khawpa chhungkaw berh ve tak te leh chhungte hnen atanga hmangaihna an dawn tharna atana thawmhnaw thar an neihna hun a han ni thinte hi Sikpui Krismas hlutzia ti langtu hlu tak a ni awm e. Kumpui lingleta hna thawka fate tana Sikpui Krismas huna an thawmhnaw leina tura lo intuak ve tang tang te, chutiang an hlen theih avanga naupangin lâwmna an chan zawng zawngte hi Sikpui Krismas neitu Isua pawh hi a hlim zual ngawt ang.
Thawhnaw thar nei bawk, chhungkaw hlimna thar neih belh bawk, chutah nunna thar – chatuana nunna kan neihna bul Sikpui Krismas hi hlim taka hmang theuh turin tun atangin i inbuatsaih ang u.