Tuihri nia hriat tlang hri leng avangin Lawngtlai district-a Kakichhuah-ah tun thla chhungin mi pali an thi tawh.
Thudawn danin Kakichhuahah hian Tuihri nia hriat hri leng vang hian November 4 khan Lawmla, kum 75 mi a thi a, November 9-ah Neda, kum 24 leh Kailaw, kum 48 te an thih bakah Thawhlehni zing khan Sawla, kum 28 mi a thi ve leh a ni.
Damlote chu pum nuam lo, kawthalo, luak leh khawsik an ni tlangpui nia sawi a ni.
Tuithumhnar bialtu MDC H. Lalmuansanga chuan hemi chungchangah Lawngtlai Bawrhsap Donny Lalruatsanga hma la tura a hriattir angin bawrhsap chuan Lawngtlai District Chief Medical Officer Dr. Lalmuanawma Jongte nen ruahmanna an siam a, nimin khan Lawngtlai District Hospital atangin Medical Officer Dr. C. Lalzampuii hovin nurse, laboratory technician leh health worker pakhat theuhin Kakichhuah hi an pan.
Medical team chuan mipuite chu chi-ai lo tura chahin ei leh inah fimkhur tur leh tui chhuan so dah daih leh chauh in tur te, zun leh ek thlahdah lo turin an chah a ni.
Kakichhuah hi in 130 vel a ni a, Myanmar ramri dep a nih avangin Khumi hnam raltlan eng emaw zat an awm a, thite hi tual chhung mi pathum leh raltlan pakhat an ni.