Aizawl: Rural Development minister Prof. Lalnilawma chuan Union Bank of India (UBI), Saitual Branch chu nimin khan a hawng.
Keifang Police veng-a hawnna inkhawmah Prof. Lalnilawma chuan UBI Saitual Branch hawn a ni chu lawmawm a tih thu sawiin, Saitual district tan hmasawnna rahbi pawimawh tak a nih thu sawiin, bank leh mipuite chu inmamawh tawn reng an nih avangin thawhhona tha tak an neih a pawimawh tih a sawi.
Minister chuan bank chu loan lak nan leh sum khawl nan a tangkai tih sawiin, Mizo mipuite chuan bank-ah te sum khawl neih uar a pawimawh thu a sawi bawk.
UBI hi India rama public sector bank lian ber pangana niin, November 11, 2025 hi kum 107 a tlinna chiah a ni. April 1, 2020 khan Andhra Bank leh Corporation Bank te nen inthlunzawmin, India ram pumah leh ram pawnah te branch 8,600 chuang, ATM 10,000 chuang leh thawktu 74,100 chuang an awm a. Ram pawnah hian Dubai International Financial Centre (UAE), Sydney (Australia), London (UK) leh Malaysia-ah te branch, banking subsidiaries leh joint ventures ang tein an inzar pharh bawk a ni.