MSU hruaituten zirna in hrang hranga casual teacher dinhmun tha zawk pek an nih theihna turin Education Minister Dr Vanlalthlana an ngen.
Thawhlehni tlai khan MSU hruaituten Hnahthiala MSU General Conference neih taka hmalakna tur an relte bawhzuiin education minister chu a pisaah an kawm a. MSU hruaitute chuan zirna in hrang hranga casual teacher-te (i.e middle school, high school, higher secondary school leh college) dinhmun tha zawk pek an nih theih nan an ngen a. Minister chuan sorkarin zirtirtute an ngaih pawimawh thu sawiin casual teacher-te pawh an ngenna angin an dinhmunte chu an lo ennawn leh tur thu a lo hrilh.
MSU chuan higher secondary school leh college zirtirtu nghet (direct recruitment) a zing thei ang bera lak a nih theih nana hmalaksak turin minister hi an ngen a. Minister chuan sorkarin direct recruitment lak a nih theihna tur hian hma an lak tur thu a sawi a. Post ruak tam tak hnawh khah dan turah DP&AR nen inrawna hma an lak tur thu a sawi.
MSU hruaituten Mizoram Engineering College, Lunglei chu a nih dan tur ang taka a kal vat theih nan hmalak pui tura an ngenna pawh, Minister chuan theihtawp an chhuah mek thu a sawi bawk.