Aizawl: YMA Central Co-ordination Committee-in Mizo hnam lam Cheraw duhdah taka hnam dangten an kân chu Mizo hnam lam tihbawrhbannaah ngaiin, tun hnuah thleng tawh lo se an duh thu an sawi.
Nilainia YMA Central Co-ordination Committee chu Central YMA Hall, Tuikhhuahtlang-ah Central YMA President R. Lalngheta kaihhruaiin an thukhawm a. CCC Meeting-ah hian palai kalte chuan tun hnaia Red Bull Tlangruam, Aizawla buatsaih puala Mizo hnam lam, Cheraw duhdah taka hnam dangten an kan chu Mizo hnam lam tihbawrhbanna a nih thu leh tun hnuah hetiang hi thleng tawh lo se an duh thu an sawi.
CCC thukhawm hian YMA Inkhawmpuilian Vawi 75-na, Sakawrdaia hman zawh taka rorel inkhawma an thurelte bawhzui dan tur an sawi ho va. Chung zingah chuan, Mizoram chhunga hnam dang sumdawng, phalna nei lo tam ta lutuk titlem turin CEC-in ruahmanna siam se an ti a; Mizo hmeichhiaten hnam dang pasal an neih zel loh nan Central YMA-in inzirtirna nasa zawkin kalpui rawh se, tih pawh hma lak dan tur CEC-in ruahmanna lo siam rawh se an ti a, Zo hnahthlak chi peng hrang hrang Mizorama chengte zingah chi bil hmalakna a awm tawh loh nan Central YMA-in hma la rawh se tih chu CEC-in hmalak dan tur ruahmanna siam se, an ti bawk.
Hei bakah hian sorkar khawih zingah, Inner Line Permit (ILP) tun aia khauh leh awmze nei zawka kalpui a nih theih nan YMA-in sorkarah thlen rawh se, tih chu CEC-in ruahmanna lo siam rawh se, tih a ni a. Mizoram chhunga inkalpawhna kawngpui hrang hrang a chhiat avanga mipuiten harsatna an tawk nasa lutuk thin chu a lo ziaawm theih nan Mizoram sorkarin tun aia chak zawkin hma la rawh se, tih pawh CEC-in ruahmanna lo siam rawh se, tih a ni bawk.