Aizawl: Lawngtlai district-a Kakichhuah-ah tuihri nia hriat tlang hri leng vangin Nilaini dar 4 vel khan mi pakhat a thi leh.
Hri leng vanga thi hi Chawlithaw (14) a ni a. Heti hian Kakichhuah-a tuihri nia hriat, tlang hri leng vanga thi chu mi panga an tling tawh a ni.
Hri vanga thite hi Khumi hnam an ni a, mitthi zinga pahnih chu Myanmar atanga Kakichhuah-a raltlan an ni a, pahnih chu Myanmar-a Salachhuah khaw mi niin, pakhat chu Kakichhuah tualchhung mi a ni.
Hri leng hi Kaikichhuah bakah khaw thenawm Hruitezawl leh Siaha district-a Lungdar-ah te a thleng tawh nia thu dawn a ni a, tun dinhmunah Kaikichhuahah hian tun dinhmunah damlo 30 vel an awm mek a, an zinga pathum chu an na zual a ni.
Kakichhuah a hrileng avangin Lawngtlai district Magistrate Donny Lalruatsanga chuan Kakichhuah chu tlawhpawh theihloh tura kharkhipna thupek Nilaini khan a chhuah a, mipui chi-ai lo tur leh damdawi lam thiamte thurawn ngaipawimawh turin a chah.
Hri leng hi a darh zel loh nan Kakichhuah Branch YLA chuan mipui pawn chhuah a khap a. Hri a darh loh nan mitthi sawngbawl leh vuinaah pawh mipui nawlpui punkhawm an remti lo va, mitlawmngai thlanchhuah ten an buaipui a ni.
Young Lai Association, New Kakichhuah Branch pawhin thuchhuah siamin, an khua atangin zinchhuah an khap a, damdawi lam thiam leh an harsatna buaipuitu tur nilo chu tumah an khua a lut lo turin an ti bawk.