Sunil Chhetri chuan India aiawha khelh a tum tawh loh thu a sawi bakah kum tharah chuan football khelh pawh a chawlhsan mai thei tih a sawi.
AFC Asian Cup 2027-ah khan Chhetri hi a inlan ve a, he mi hnuah hian ram tana khelh zui a tum loh thu hi a sawi chhuak.
Nikum June thla khan Chhetri hian ram tana khelh a tum tawh loh thu a lo puang tawh a, chu mi hnuah head coach kal chhuak ta, Manolo Marquez chuan Indian footballer tha ber pawl tia sawi hi kir leh turin a hmin leh a, hei vang hian a inkhelh leh phah a ni.
India chu an che tha vak lo a, AFC Asian Cup 2027 khel turin an tling zo ta lo a, hetiang a nih takah chuan Chhetri hian ram tana inkhelh zui tawh loh thu a titlu tak tak ta a. Kum 42 mi hian Indian Super League (ISL)-a Bengaluru FC dinhmun azirin inkhelh hi chawlhsan zui a tum dawn leh dawn loh a sawi chiang ang.
Chhetri chuan, “ISL-ah kan champion a nih chuan ram tana khelh theihna hun thate pawh a la awm ve thei mai thei a. Kum 42 nih tawh chuan engmah hi awlsam a awm tawh lo. Tun season chhungin goal 15 thun tling ila, chu mi hnuah inkhelh chawlhsan thei tawh ila tih hi ka duh dan a ni,” a ti.
Kumin August thlaah India mipa football team head coach Marquez chu Khalid Jamil chuan a thlak a, Chhetri chuan Jamil hnenah hian ram tana inkhelh a chawlhsan thu hi a hrilh tih sawiin AFC Asian Cup 2027 qualifying khel tura kir a nih thu a sawi.
“Khalid hnenah ram tana khelh zui ka tum tawh loh thu ka hrilh a. National team ka zawm khan ka tum ber chu AFC Asian Cup 2027 khel thei tura India team tlinpui kha a ni a, a bak a awm lo. Qualifying khelh tur awm lo ta se ram tana khel tur hian ka kir tawh miah lo ang. Kan tling zo dawn lo tih a chian hnuah khan coach hnenah lawm takin ram tana ka khelh dawn tawh loh thu hi ka hrilh a, a lo hrethiam khawp mai,” tiin Chhetri chuan a saw.
ISL-a Chhetri a chet that em avangin Marquez khan ram tana khel turin a koh thar leh phah a. Goal 14 a thun a, Golden Boot dawngtu, Alaaeddine Ajaraie chiah tluk loh a nei a ni.
A tirah Chhetri chuan chawlh puan hnua kir leh kha chu a hreh viau a, India tana a feh chhuah leh hnuah vawi ruk khelin goal khat chiah a thun thei a. A chawlh tak tak thlengin Chhetri chuan India ram tan goal 95 a thun hman a ni.