Aizawl: New Delhi a cham mek P&E Minister F Rodingliana’n Small Hydro Incentive Scheme hman tangkai thuai a nih theih nan a rang thei ang bera tichhuak turin Ministry of Power leh Ministry of New & Renewable Energy Pralhad Venkatesh Joshi a ngen.
Nilainia MNRE minister nen inkawmnaah P&E minister hian tuikhuah megawatt 24 chin tharchhuak thei tanpuina Small Hydro Incentive Scheme thar thawh leh tura sorkar laipuiin a ruahman mek avangin lawmthu a hrilh a. He scheme hi hman tangkai thuai a nih theih nan a rang thei ang bera tichhuak turin union minister a ngen a ni.
MNRE Minister Joshi hian Small Hydro Incentive Scheme for North East chu finance ministry-in a pawmpui veleh union cabinet pawmpui tura thawn vat a nih tur thu P&E minister hi a hrilh a. Mizorama thli chakna hmanga power siamchhuah kawnga ministry-in zirchianna a lo neih tawh chu thar thawh leh turin P&E minister-in a ngenna pawh a zirchiang tur mithiam a tirh tur thu a lo hrilh bawk.
Union Power Secretary Aggarwal nen an inkawmnaah F Rodingliana chuan, Mizoram hmun hrang hranga power transmission line tihchangtlunna tur leh chhim lam power lakna tihchangtlunna tur, Hnahthiala sub-station din tur chu tihpuitlin anih thuai theih nan a rang lama hmalakpui tura a ngenna pawh a lo bawhzui tur thu a sawi.
P&E minister hian Power Finance Corporation Chairman Parminder Chopra a kawm bakah Delhi Mizoram House-ah Reliance Group-a an hotute a lo kawm tawh bawk a ni.