Aizawl: Chief Minister Lalduhoma hovin a pisa-ah Ningani khan NCC Mizoram Group Headquarters din tura hmalak mek chungchang an sawi ho.
Mizoramah hian NCC Unit 4 leh Cadets 8,000 an awm mek a. Silchar Group Headquarters atanga enkawl thin an ni. Kumin July thla khan NCC thuneitu sangin Mizoram Group Headquarters hi Mizoramah ngei awm tawh se an tih angin, Mizoram sorkar Council of Ministers chuan September khan a pawmpui a. Tunah hian inbunna hmunhma leh an mamawhte ngaihtuah mek a ni.
NCC kalphungah Unit zawng zawng hi NCC suma an enkawl a ni a, Group Headquarters erawh hi chu an awmna state sorkarin a ngaihtuah ve thung.
Sawihonaah hian Sports & Youth Services Minister Lalnghinglova Hmar pawh a tel.