Aizawl: Dampa bial by-election inthlana vote tlate chu vawiin zing dar 8 atangin chhiar tan a ni dawn.
November ni 11, 2025-a Dampa bial by-election vote thlakte chhiar turin inbuatsaihna vawrtawp a thleng ta. Ningani khan LAD Conference Hall, Mamit-ah counting agent-te tan briefing neih a ni a. Nimin chawhma vek khan DC Conference Hall, Mamit-ah Master Trainer Mary L Rodingpuii kaihhruaiin Counting Official-te’n training an nei bawk.
Dampa bial by-election-a vote thlak vawiin zing dar 8 atangin DC Conference Hall, Mamit-ah chhiar tan a ni dawn.
Tar lan tawh angin, Dampa bial by-election inthlanah voter mipa 10,637 leh hmeichhia 10,231, an vaiin mi 20,888 awmah, vote tla zat hi mipa 8,921 leh hmeichhia 8,430, an vaiin mi 17,351 a ni a. Vote tla hi 83.07% a ni a. Hetah hian Postal Ballot hmanga vote tla chhiar tel a la ni lo va. Kum 2023 MLA inthlanpuia Dampa bial inthlana vote tla 86.23% aiin 3.16% in a tlem zawk.
He inthlanah hian candidate panga – National party pahnih – BJP candidate Lalhmingthanga leh INC candidate John Rorluangliana; tualto party pahnih – MNF candidate Dr R Lalthangliana leh ZPM candidate Vanlalsailova bakah unrecognised register party MPC candidate K Zahmingthanga ten an chuh a ni.