Aizawl: Kumin January 1 atanga November 10 thleng khan Mizoramah dengue natna exam 27,950 atangin a vei mi 1,846 hmuchhuah a ni tawh a. Mi pakhatin nunna a chan tawh bawk.
Aizawl leh a chhehvela dengue natna hluar mek chungchangah State Vector Borne Disease Control Programme (SVBDCP), National Health Mission, Health & Family Welfare Dept. chuan Ningani atanga tanin ni hnih chhung awh turin ATI Auditorium, MINECO, Khatla, Aizawlah Aizawl Municipal Corporation (AMC) huam chhunga local council 87 atangin member pahnih zel kokhawmin inzirtirna leh invendan bakah khawtlangte nena dengue tirem tura thawh ho dan tur an sawi ho.
Dr Lalzawmi, Additional Director cum State Prog Officer (VBD), NHM chuan Powerpoint presentation hmangin Mizoram leh India rama Dengue dinhmun tlangpui a sawi a. Malsawmtluangi Pachuau, Consultant, Deborah Lalpuii, Consultant leh Dr. Lalfakzuala Pautu, State Entomologist te’n Dengue natna chungchang an zirtir a. Dr. PC. Lalhmingliana, Jt. Director (Malaria) kaihhruainain local council member-te nen zawhna leh sawihona hun hman a ni.
He huna tar lan a nih danin, kumin January 1 – November 10 chhungin Mizoramah dengue natna exam zat 27,950 niin, dengue natna hmuhchhuah zat chu 1,846 a ni a, kuminah Dengue natna avanga nunna chan pakhat an awm tawh bawk.
Kumina dengue natna hmuhchhuah zawng zawng atangin AMC area chhunga mi hi 975 niin, za zela 52.82 a ni.