- Dr. C. Lalrampana
Mizoram chief minister chu hetiang – Pu Ch. Chhunga (1972-1977): May 3, 1972 atanga May 10, 1977 thleng khan Mizo Union Party hnuaiah a ni a. A pahnihnaah Brig. T. Sailo (1978-1984): Term hnih a ni a, June 2, 1978 atanga November 10, 1978 thleng a ni a, a hnuah May 8, 1979 atanga May 4, 1984 thleng khan Mizoram People’s Conference Party hnuaiah a ni. A pathumna chu Pu Lal Thawnawla (1984-2018): term 4-a CM a. May 5, 1984, atanga August 20, 1986 thleng; January 24, 1989 atanga December 3, 1998 thleng; December 11, 2008 atanga December 11, 2013 thleng; December 12, 2013, December 14, 2018 thleng khan Indian National Congress Party hnuaiah a ni.
A palinaah Pu Laldenga (1986-1988): August 21, 1986 atanga September 7, 1988 thleng khan Mizo National Front Party hnuaiah a ni. A panganaah Pu Zoramthanga (1998-2008, 2018-2023): Term hnih a hmang a, December 3, 1998 atanga December 11, 2008 thleng; December 15, 2018 atanga December 7, 2023 thleng Mizo National Front Party hnuaiah a CM a ni.
A paruknaah Pu Lalduhawma (2023-present): December 8, 2023 khan Zoram People’s Movement Party hnuaiah a CM tan a, tun thlengin a la chelh mek a ni.
Chief Minister 6 kan hrawn chhung hian inthlanpui (General Election) vawi 11 kan hmachhawn tawh a, hetih chhung hian Election Commission of India (ECI)-in inthlan dan bawhchhia a zilhhauh hmasak ber chu Pu Lalduhoma Zoram People’s Movement Party hi niin a lang.
MNF Legal Board member Zothansangi Hmar lehkha thehluh kal zelah Election Commission of India (ECI) chuan Chief Minister Lalduhoma chu Dampa bye-election neih tura a awmna party, ZPM tana a campaign-naa thu a sawiah Model Code of Conduct (MCC) a bawhchhiat avangin a zilh a, ZPM star campaigner zawng zawng poawh fimkhur turin a hrilh nghal bawk.
Zothansangi Hmar hian October 24 khan Joint Chief Electoral Officer, Mizoram hnenah chief minister-in MCC a bawhchhia tiin a thlen a, hemi chhanna leh hmalakna hi Joint CEO hian Inrinni khan a hnena hriattirna lehkha a thawn leh a ni.
Joint CEO-in a chhannaah hian ECI-in Chief Electoral Officer, Mizoramin record a neihte an en hnuah chief minister hian ‘MCC for Guidance of Political Parties’ Part VII Para (vi) a bawhchhia a, a thil sawi dan chu an dem bawk tih a tar lang.
District Election Officer, Mamit chu ZPM Party hnena hriattirna pe tur leh ZPM party star campaigner-te chu MCC tha taka an zawm theihna tura ZPM president hriattir nghal tur te, mipui hnena thu an sawi turah inthlanna nihphung leh a thianghlimna vawng nung reng tur leh sorkar hnathawkte leh minister-te chu MCC-in a phut avangin fimkhur tura hriattir tura tih a ni bawk.
Zothansangi Hmar-in Jt. CEO hnena chief minister-in MCC a bawhchhia nia a thlente hi October 20-a Reiek khuaa thlai thar sawngbawlna kawnga hmasawnna tur ruahmanna tharlam thawhsak a nih tur thu leh hmasawnna tam tak bial mipuite a tiamna te, a tuka New West Phaileng-a thu a sawiah Rs. vbc. 770 man Reieka tuikhuah siam a nih tur thu leh a chhehvel khaw 14 chawm thei tur anga a sawi te, hei hi fur laia Tlawng tui pump theih loh laia Aizawl khawpui chawmtu tur a nih tur thu a sawite a ni.
Mizoram State CM 6 zet kan hrawn tawh zinga ECI-in MCC bawhchhiaa thiamloh a chantir leh a zilhauh hmasak ber la awm chhun a nih hmel a. Dan anga hrem ni lem lo mah se, National paper thleng thlenga pholan chuai chuai a ni hi a zahthlak takzet a ni. Eptu party-te hian complaint theh lut lo seng chuan zilhhau a tawk kher lovang. Mahse, a tisual ngei nia a lan avang leh, complaint a luh tak bawk si avangin, a tawn tur dik tak a tawng ta niin a lang.
Kan CM 6 hrawn tawhte zingah CM tawng tam, dangnâl (talkative) deuh deuh nia lang leh sawi hlawhte chu Pute Zoramthanga leh Lalduhawmate hi niin a lang. Pu Zoramthanga hi tawng duh viau mah se, Constitution leh MCC bawhchhe zawngin a khawsa vak lo niin a lang. Pu Lalduhawma erawh kum 2024 September thlatira USA Mizo day hmanna Maryland-a a thusawiah pawh khan Constitution of India sadai thiat zawng deuh hlaka thusawi a nei nia a lan avang khan sawi zui a hlawh hle a nih kha! Hetianga a fimkhur tawklohna hian a caliber a hnukhniam hle a tih theih hial awm e. CM lo ni tawh Pute Ch. Chhunga, Thenphunga, Laldenga leh Lalthanhawlate kha chu an intizahawm thiam hle a, an tawng ve mai mai lem lo niin a lang. A hnuhnungte pahnih Pute Zorama leh Duhawmate hi chuan social media platform hrang hrang an luah khat hneh hle thin niin a lang. Mi tawng tam, dang nâl (talkative) zingah rau rau pawh hian mi pawi sawi lo, lei la lo leh sawrkar pawisawi lo zawnga tawng tam leh dang nâl an awm a, hetiang mi hi chu an bula awm a nuam a, kawmngeih pawh an hlawh a, then rual tha pawh an ngah duh hle. Tuna kan CM hnuhung pahnihte erawh hi chuan an thuruk tur zawng zawng pawh “……lang lo tura thuhruk engmah a awm si lo, hriat loh tura zep pawh engmah a awm hek lo.” (Mat 10:26) tih ang maiin an langtlangin an lang thawrawng thin lutuk nia a lan avangin, ‘blanket approval’ thlengin Zoram mipui leh Zoram khawvel hian a hre ve nghal zel ni berin a lang. Tun atang chuan MLA leh CM chinte phei hi chuan rinawmna thutiam (Oath taking) an lak laia rinawm taka awm tura an thutiamte kha hre rengin confidential vawnghimin tawng dan tur chin tawk hre tawh thin se a lawmawm ngawt ang. Engpawhnise, hmalam hun zelah enge an an zel dawn tih i lo thlir phawt mai teh ang u.