Aizawl: PWD Minister Vanlalhlana’n Aizawl khawpui chhung kawng siam mek hna kalpui dan chu lungawithlak rih hleah an ngaih thu a sawi.
Nilaini zan khan Aizawl khawpui chhung kawng siam that mek hi PWD Minister Vanlalhlana’n a enfiah a, Krismas hmain Aizawl khawpui kawng hi a tam thei ang ber zawh fel tum a ni a. A bak Mizoram kawngpui pawimawh chin pawh nakkum fur ruahtui tlak hma ngeiin thawh vek tum a nih thu sawiin, “Mizoramin ruahtui kan dawng tha a, hna thawh hun a tlem avangin thal hun chhungin a tam thei ang ber kawngpui kan siam tha dawn,” a ti.
PWD minister chuan Aizawl khawpui kawng siam that hna thawh mek chu an vei tlang a, tuna kawng mam tha viaua lang pawh hi fur khat daih tur a awm mang lo mai thei a. Chuvangin, a chhiat hmain an phah chhuak leh vek dawn tih a sawi a. Kawngpui lun zual lai hmalakna hmasaah an hmang phawt dawn a, veng kar kawngte an chhunzawm zel dawn a, mipuite chu lo dawh hram hram turin a ngen.
Tuna hnathawk mektu Nidhi Creative Infrastructure Pvt. Ltd. te hian lirthei tlan tlem hun, zan dar 10 atanga a tuk zing thleng hna an thawk thin a, Mizoram PWD ten uluk takin an vil reng tih sawiin Vanlalhlana chuan, “Kawng chhuat chhah zawng leh quality-te uluk taka enfiah reng a ni a, an enfiah chinah a chhah zawng 30mm tura ruahmanah 43mm te ni hlawmin, a lungawi thlak rih hle a ni,” a ti.
April 15, 2025 khan Ramhlun North, Aizawlah PWD Minister Vanlalhlana hian km. 84-a thui, Aizawl khawpui chhung kawngpui siam that hna bul tanna tur a lo hawng tawh a. Fur ruahtui tlak avanga chhunzawm theih a nih loh hnuah, a tiam angin October 30, 2025 khan chhunzawm leh a ni.