Kumtluanin tui harsatna kan tawk emaw tih mai turin Aizawl veng tam takah tuisem a mumal lo hle mai a, a khaihlak nasain, lirthei hmanga tui zuarte an hlawk kumtluan hle.
A kum telin tuihna a kangchah thu hre mah ila, tuisem dan mumal lo erawh a theih ang anga sem rual theih a ni. Mahse, kumtluanin chhungtin tui mamawh khawp pek a ni lo tluan niin a lang a, hei hi a veiawm lai ber chu a ni.
Tuisem hi rual se la, a thei leh nei deuhte chu nghei lovin an awm thei pawh a ni mahna, mah se mipui nawlpui hi chu tuiah kan harsa kumtluan a, veng thenkhatah phei chuan thla khatah tui vawikhat chauhte a haw thin. Hei hi a veiawm lai chu a ni.
Ngun takin kan tui harsatna hi chinfel dan ngaihtuah a ngai tawh a ni. Sorkar hian a mawhphurtu zawng se la, minister pawhin vei berah neiin vil uluk teh se.
Thla khata tui vawikhat chauh hawte lek phei chu ngaihven ran chi a va ni em. Mipui hian harsatna a awm a nih chuan kan hriat ve a ngai a, kan tui haw loh fona hi a chhan kan hriat ve hi kan bat a ni. Mipui phun thawm a nat zual tak tak hma hian sorkar hian kan tuisem dan hi ngaihven rangin, chingfel thuai mawlh teh se.