Aizawl: Urban Development & Poverty Alleviation (UD&PA) department leh Public Health Engineering (PHE) department-te chuan Sewage Treatment Plant, Chite-ah Mizorama Atal Mission for Rejuvenation and Urban Transformation (AMRUT) leh Swachh Bharat Mission (SBM) scheme kalpui dan turah thawhhona thuthlung (Charter of Convergence) chu Ningani khan an ziak.
Charter of Convergence hi UD&PA aiawhin Lalmalsawma Pachuau, Secretary leh PHED aiawhin Zodingpuii-te’n an hming an ziah hnan a ni.
Thawhhona thuthlung ziah puala inkhawmah khuallian UD&PA Minister K Sapdanga chuan, department pahnih an thawk dun thei tur chu phurawm a tih thu leh an thawhhona tur, waste management chu hmasawnna tangkai tak, hriselna leh himna nena inkawp tlat a nih thu a sawi a. Ni khata Aizawl khawpuiin tui a hman zat chu litre mtd 36 vel a ni a, drain mumal awm lohnaah chuan leiah a luang ral a, chu chu fura leimin a tam thin chhan pakhat a ni, a ti a. He thawhhona hi a hlawhtlin chuan khawpuia leimin venna tha tak a nih tur thu leh tuichhia chu sawngbawl a nih hnuah khawpui cheimawina atana hman theih a nih thu sawiin, “Tui hmangin khawpui chu hmasawnna rahbi thar kan kaipui dawn a ni,” a ti.
Khualzahawm PHED Minister Prof. Lalnilawma pawhin thu a sawi bawk.