- K. Hmingthankaia
Dampa MLA bial bye-election 2025 result-ah MNF candidate Pu Lalthangliana a tling. Mamit district MLA bial pathum, Mamit, Dampa leh Hachhek te hi 2023 Mizoram assembly inthlana MNF chakna bial vek an ni. Tun bye-election-ah erawh ZPM pawhin 2023 inthlan aiin a pumpuiah vote an hmu tam zawk thung. ZPM tan beidawn lutukna tur chu a la ni chuang lo. Mahse, kum 2 chang chang chauh la ruling laia bye- election-a hnehna chan loh chhan erawh ngaihtuah chian a ngai khawp ang.
Rorel lai ZPM tlin loh chhan no. 1-ah chuan ‘Kawng’ a ni ngei ang. Dampa bialah bye- election a la awm dawn tih hriat reng hnu-te kha chuan, opposition hoin theihpatawpin an bei dawn tih hriain, Mamit district lam kawngte kha chu theihpatawpa tan lak tur a ni a. Fur lai kawng siam hleitheih loh lai pawh ni se, theihtawp an chhuah a ni tih kha mipui han hmuhtir sela chuan, inthlan result kha a dang ngeiin a rinawm. Chu lo pawh chu chhan dang pawh a awm thei tho anga. Hmun danga thil tih theih reng tih duh loh luih tlat avanga tute emaw lungawi lovin, Zoram pum mipui hriat tura an vui thu an sawi vang te pawhin an dinhmunin a hniam phahte pawh a ni thei bawk. Engpawh nise, zamna tur erawh a la ni lova, inenfiahna leh insiam thatna tur hun tha a la tam lutuk.
Engpawh nise, tun tum bye- election hi chu a boruak a danglamin a sang em em hrim hrima, General election ang chiahin party tin an tang na em em a ni. Party lian ho, BJP pawh telin, tan theih dan zawng zawngin an tanga, tiam theih awm apiang chu an tiam zur zuta. Insawi mawi theih leh insawi itawm theih dan chitin rengin an insawi a, sawichhiat chitin rengin mi dang, a bik takin rulling ZPM chu an thiam tawpin, uchuak takin an sawi chhe theuh a ni. Tan lak theih dan chikimin tan an la a, mawngkaw tha nen lam an tang niin a hriat ber hlawm. Pawisa pawh kawng hrang hrangin an seng nasa ngawt ang tih a hriat reng. Pawnlam atanga lo thlir chuan, chung ho zinga tang nasa ber, inseng nasa leh tal na ber leh che na ber chu MNF hi an nih hmel bawk. ZPM leh BJP pawh an inseng viauin a rinawm bawk.
A hmaa tu khawkhain an ngaihsak loh, bial hnufual ber kha bial pawimawh ber a lo chang ta emaw tih turin, Central BJP sawrkar leh Mizoram mipui leh political party zawng zawng chuan an ngaihvenin an hmangaih thar ta em em vek mai a ni.
Dampa bial mipui tan chuan, thla khat zet awh Festival ropui lutuk, anmahni mamawhtu leh tlawntu mipui tam tak zi hut hut leh sum leng nuai nuai hun ropui an tawng a ni ber ang chu. Pui hep hepin nuam hep hep tur tak a ni. Khatih laia ram kal bik nih pawh kha a chakawm lo maithei. Dampa bialin hun ropui ber a tawn lai pawh a ni hial tawh maithei. General election awm tawh zawng zawng ai pawhin tun tum bye-election kha Dampa bial tan chuan a la hot ber zawk maithei bawk.
Mahse maw, inthlan a zo tawh. Mipui chi hrang hrang vir hut hut leh sum leng nuai nuai a reh duk anga, Dampa mipuite chu an khua a har ngawtin ka ring. Tu pawh lo thlangtling ni se, kha’ng anmahni hmangaihtu zawng zawng leh an thlantlin ber pawh chuan chuti tehchiama an rawn hmangaih zui leh an rawn hriat zui vak hi kei zawngin ka ring mawlh lo a ni.
Mahni hmasial vang leh lalna inchuh nana political ball atana mipui min hman nasat tawh teh reng nen hian, kan harh mawh si a. Nuam hi kan lo ti ve em em zawk ringawt zel thin si a, a tak ram hi engmah tak tak a ni leh ngai si lo. Changkanna dik neih hi chu a hla a ni.
Mipuite hian inthlan laia dawt min hrilhtute hi cha chhuah zat zat ila, an intiamnate chu ti hlawhtling thei chuang lo mah se, tlem talin zak ve sela, hun lo kal tura politic awmze nei leh tha zawk khel turin an fimkhur deuh tawh mahna.
Tun tum bye- election-ah pawh Zoram mipui zawng zawng kan lo phur ve em em ringawta, tai pawng pawngin kan lo tanga, tu tute emaw huat zawng kan sawi a, mahni kan inti nepa, mahse, a tawpa hlawkna tel tur chu mi pakhat leh a thurualpui mi tlemte chauh, chu pawh mahni tanghma tan chauh a ni leh tho thin.
Chuvangin, tun atang chuan Dampa bial mipuite pawh a duh miah lo ula, bial hnufual nih duh tawh lovin, duh taka in thlan tlin hnenah chuan in duhte chu ti hlawhtling turin um zui char char ula, intiamnate a lo nei a nih chuan, a tih hlawhtlin leh tlin loh chu Zoram mipuiten kan lo thlirpui reng ang che u.