- K. Hmingthankaia
Bazar ka kal apianga ka chawlhna thin, Aizawl khawlai lun leh langsar lai taka Vai restaurant hi addict ho hian an palzut thin hle a. Tuk khat erawh kawngkaa ka chhuak tur chiah hi kan veng mi damdawi ti ve thin tho hian, ” Pa Kai, thingpui in man tur mi lo pe teh” a ti a. Kei chuan vin takin, ‘ Pawisa nawi ka nei lo’ ka lo ti deuh thak a. Ani chu zah hmel deuha a kal ta vang vang chu ka inthiamlo leh ta si a, hla deuh tak, Minister Pu F. Rodinglianate in a thleng tep tawh chu ring takin ka ko let a. ‘ Nang chu i polite-in i fai thei bawk a, ka pe ang che. Midang hi chu ka haw teh a nia’ tih pahin cheng 50 chu ka pe ta a.
Aizawl khawlai dunga addict bal tawp lutuk ho zak miah lova an khawsa leh an thu mu phengphung thinte, an inchiu mawlh mawlh thinte hi chu kan sawi hnem taa, sawi nawn ngai tawh lovin kan hriat tlan vek a nih hi. Sawrkar leh mipui lam pawh hian hma lak dan tur ber hi kan la hre lo a nih hmel si a. Khung khawm bo mai hi a tha ber kei chuan ka la ti reng.
Khawlaia addict hoin pawisa mi dil chawt leh, dawt nalh tak tak leh nal taka rang tak taka an sawi zar zar thin hi hneawm ka ti a. Pek duh lohvin a thinrim zawkahte an la tang zui a. ” Min pe lo tawp rawh” te hi an han ti tau vin ta thina. Cheng 10 pek phei chuan an thinrim zawk thin nia mawle.
Ka sawi duh tak zawk chu, inrinnia Aizawl bazar lun deuh deuh hoa addict ho lo inrawlh ve tam lutuk hi an ninawmin, ven an ngai nasa a ni tih hi a ni. Bazar tawt luih luih karah hian an lo inzep ve zela, thil kan lei laite hian kan bulah kan pawisa phawrh vel dan hi an lo thlir ru reng thina, pawisa min lo dil leh chawt thin a ni. Rik luih luih kara fimkhur vak lova kan lo awm thin chu hlauhthawn a na leh duh hnuhnawh thin. A chang leh thil eng eng emaw min lo zawrh sek bawk thul. Ninawm leh venthawn reng ngai an ni. Bazar kal nu tam tak nen an inhau bawrh bawrh lai hi ka hmu fo mai.
Bawngkawna motor inpelh chungchanga silaia an inkah tuk chiah khan ka bazar a. Bazar pui lam atanga ka hawlam chu, ka tih thin dan anga Tennis court lam, Horticulture office phei vela ka bazar final phei zel chuan mi pakhat ka hmu a. A awmdan vel ringhlel deuh chunga thui deuh hlek ka kal pelh hnu chuan, nu pakhat hian, ” Kha pa khan ka mai a la ringawt a nia, lo man r’u” a rawn ti lauh lauh a. Kei ka inak bawr tawh si. Ka hnunglamah rawksai rit tak bakah, bazar bag dang ka la khai bawk si chuan, miadangin an umpui em tiin ka hawikuala, tumah chu che chhuak duh an awm si lova, ka theih tawk chuan ka umpui ta a. Rukru pa lah chuan chak deuha kal chungin, “Ka lei a nih hi” a ti phei vak vak a. Keiin, ‘ I leina sawi rawh’ tiin ka um phei zela, a neitunuin a rawn um thlen ve chuan, ka lei a nih hi ti chung zel chuan a lo pe leh ta tho si a.
Ka let san pah chuan ka rilruin, ‘ Aw, kan ram hi chu sualna te deuh atanga lian tak thleng hian a va chiah hneh tawh tak em. A te deuhin an tisual te a, lian deuhin an tisual lian a, mi dik lo leh mi awm tha duh lote lah hian zah a hnekin mi pangngai leh khua leh tui thate hi an nekchep zawk ta mah si a. Khua leh tui thate hian kan hlau zawk ta a nih ber hi. Hei, tunah pawh a thil ruksaknu chuan mangang leh au chungin amah chauhin a um a, mi heti zozai zingah tanpui tura che chhuak duh awm miah lovin an en thup ringawt a nih hi. Vairam kan va ang ta ve le. Kan inpawlhsawp ta lutuk hi a pawi a ni. Nizana Bawngkawna mi kaptu chanchin kan hriat belh lah chu, chuti bawk chu a lo ni leh si. Hmana Mizo nun leh hmana Mizoram kha a va ngaihawm ta em,’ ka ti rilru a. Rit lutuk lo ila chuan a rukin lo zui phei zel ila, midang, thingtlang nu ho thil zawrh a ru lai thla lo la ila, police koh mai tur a nia. Vairam ang maiin mahni hlawkna tur ni lovah hi chuan mi manganna leh eng thilah mah inrawlh hi kan tum ta mang si lova, ka ti rilru a. Mahse, ka rih em avang leh ka pelh thui deuh tawh avangin ka kir peih ta lo a ni. Chutiang chu Aizawl khawpui leh bazar hrang hranga thil awmdan chu a lo ni ta a nih hi.
Chuvangin, Aizawl khawpuia addict hnawksak lutuk ho veng tur leh vai tur bik police te hi awm thei sela. Chutiang chu kan tlin ngang lo a nih pawhin, inrinni bazar ni chauh tal hi chuan, bazar lun deuh deuh hoah tal hi chuan mipuite hi sawrkar police-te hian min thlamuanin min venghim ve teh se.