Bihar assembly inthlan zawh taka hnehna chang, National Democratic Alliance (NDA)-a tel party-te chuan sorkar thar siam turin hma an la nghal mek a. Thil hre chiang deuhte chuan seat la tam ber, BJP chu minister ngah ber an nih dawn a, Janata Dal (United) hruaitu, Nitish Kumar-a erawh chief minister a la ni zel dawn niin an sawi.
Sorkar thara minister turte hi BJP hruaitu, Union Home Minister Amit Shah-a kaihhruaia thutkhawmah tihfel a ni dawn a, a party atang hian minister 15/16 awm tura ngaih a ni a. JU(U) atangin 14 vel an awm ang thung dawn nia sawi a ni.
Bial 243 awmna Bihar assembly hi November 6 leh 11-ah inthlangin Zirtawpnia vote chhiarah NDA zinga mi, BJP chuan bial 89-ah hnehna changin JD(U)-in MLA 85 an nei bawk.
An thawhpui dang, Lok Jan Shakti (Ram Vikas) chuan bial 19-ah hnehna changin cabinet minister pathum an nei dawn nia sawi a ni a. Jitan Ram Manjhi-a kaihhruai, Hindustani Awam Morcha (Secular) chuan bial nga lain Upendra Kushwaha-a kaihhruai, Rashtriya Lok Morcha-in MLA pali an nei bawk a, minister pakhat ve ve an nei ang a. MLA paruk zelah minister pakhat angin an chhut dawn niin thil hriate chuan an sawi.
Sorkar thar hi November 19 emaw, 20-ah emaw lak luh tura ruahman a ni tih an sawi bawk.
NDA tangrual hian Bihar inthlanah khan hnehna an chang chiah hle a, bial 202 zet an la a. BJP chu party mala MLA ngah ber niin an dinna bial 95% dawnah hnehna an chang.
Hetih lai hian Rashtriya Janata Dal (RJD), Congress leh Left party pathum telna, Mahagathbandhan erawh an che chhe hle a, bial 35 chauh an la a. Inthlan strategist thin, Prashant Kishor-a kaihhruai, Jan Suraaj Party (JSP) chu bial 238 zetah ding mah se chakna an nei lo va, All India Majlis-E-Ittehadul Muslimeen (AIMIM)-in bial nga an la ve bawk.
Chiang taka hneh an nih hnuah Congress chuan Election Commission-in inthlan a kalpui dan leh ‘hmanhmawh taka’ Special Intensive Revision (SIR) an kalpui chu an puh.
Hetih lai hian BJP chuan hetianga NDA-in hnehna chiang taka an chang hian mipuiin SIR tha an tihzia a pho lang niin an sawi ve thung a, eptu tangrualten ram an tihhmingchhiatna leh chi leh sakhaw behchhana ram an thennaah ‘hremna’ an hmu niin an sawi.
Rorel lai party hian Bihar-a hnehna an chang hian inthlan hmabak, West Bengal leh Tamil Nadu-ah NDA-in hnehna an chan tur kawng a hawng niin an sawi bawk.