Dampa bial assembly constituency bialtu Lalrintluanga Sailo boral avanga bye election neih chu campaign boruak sang tak hnuaiah zo fihlimin MNF party candidate Dr. R. Lalthangliana chu a tling ta a, MNF bial chu MNF bialah bawk a let leh ta a ni.
Dampa bial inthlanah party tinin theihtawpin campaign an bei a, a tir atangin ruling party ZPM leh MNF chu inbei ber tura ruat an ni sa a, vote chhiar thlengin heng party pahnihte hi an in um a ni. Campaign-ah hian ruling party ZPM lam chuan sawrkar chelhtu an nih avangin bialchhung tana chhenfakawm ber tur an nih an tlangau pui a, opposition lam chuan ramchhunga an rorel danah mipui tana thil tha sawrkar kal lai mekin an thlen loh thute, sawrkar chu hleih neia rorel leh Mizoram tan pawha thil hlauhawm FCAA 2023 pass tu an nih avanga thlan tlak an nih tawh loh thu leh MNF chu ram tan a lo kir leh mek a ni an ti a.
Hetianga an campaign thu leh hla indo karah opposition lam chuan hnehna an chang ta hlauh mai a, democracy rama inthlan tehnaah chuan sawrkar kal lai mek chuan mipui rinna a hloh tawh a ni a tih theih ang. Kum 2021 khan Serchhip bial chu an bialtu MLA Lalduhawma chu an ban avangin bye elction neih a ni a, Lalduhawma ZPM thlan tlin a ni. Hemi tum hian ZPM hian khatih laia sawrkar mek MNF party chu nasa takin an aukhum a, mipui rinna an hloh tawh a ni an ti a ni.
Kum 2023 a MLA thlan khan MNF bial ni mek tam tak chu ZPM party hian an chhuhsak a, Dampa bialah pawh hian MNF an tling naa a mizo hlang awmna area-ah chuan ZPM an chak vek tawh a. Mahse tuna bye election ah hian a mizo chenna lam area ah pawh ZPM hi an che chhia in kumhnih lek kalta a inthlan an phak lo hle. Chakma area hi chu sawrkar dinglai han tehnaah mipui hian an ngai lo tlangpui a ni.
Inthlan result puan a nih hnua titi hrang hrangah hian mipui tam ber chuan kan sawrkar hi a in enlet a, an kaldan an thlak a ngai a ni an ti a, kan sawrkar hian kumthum hun an la nei a, mipuiin an duhkhawp lohna a lian hle tawh tih a chiang. Tunah hian mipui ngaihdan a lang fiah a, duhkhawp lohna phuhruk tur hian tih tak taka tan an lak a ngai hle a ni. An inenfiah a, tawng thlahdah mai maite hi mipui hian an ngai haw hle tih an hriatchian a ngai a ni. Chutiang a ti lo va, tun ang ringawta sawrkar an kalpui chuan 2028 a inthlan lo awm leh turah an sawrkar dawn tawh lo tih an inhriat a ngai a ni.