Aizawl: November 13-15, 2025 chhunga Kawmzawl (Pukpui, Lunglei)-a Leitlangpui Music Festival (LMF) 2025 buatsaih chu hlawhtling taka hman niin Inrinni zan khan a hmawr bawk fel a ni.
LMF 2025 tawp zanah Tourism Minister Lalnghinglova Hmar-in hmanpuiin, Leitlangpui a chul dawn lo tih mai an duh tawk loh thu leh Leitlangpui a vul zel dawn tih an duh thu sawiin, nikum lamah hlawhtling taka Leitlangpui Music Festival bul tan a nih hnuah, kuminah a aia ropui zawka buatsaih niin, nakkumah ropui lehzualin buatsaih zel tum a ni, a ti a. Lunglei chu Mizoram rimawia sulsutu, Serkawn Concert lo chhuahna a nih angin Leitlangpui Music Festival pawh a par vul zel dawn a ni, a ti.
Tourism Minister chuan Mizo leh Mizo an inlawm a, Mizo hla saa an zai thup thup te, an hla, an zaithiam leh rimawi tum thiamte an ngaisang te hi rimawi kutpui tihlawhtlingtu a ni tiin, Mizoram tourism-in thang zel tura a mamawh a nih thu a sawi a. Mizoram hmun tina mite chu intlawh tawn sup sup a, hunpui leh hun bil (event) buatsaih a, chumi kaltlang chuan tualchhung mite ipteah sum a luh a, ram eibar dinhmun (economy) chawikan a nih chu tourism-in a tum a nih thu sawiin, event tha, khualzin hip thei buatsaih zel tum a nih thu a sawi.
LMF chu a tiak dawn a, tourism erawh a tiak dawn lo tiin Lalnghinglova Hmar chuan, Aizawlah December 15-23 chhungin Winter Festival buatsaih tum a nih thu te, Krismas lam hawia hun duan a, Krismas carol leh Krismas costume parade te buatsaih tum a nih thu te a sawi a. December 31-ah a huhovin Mizo thalaite tan Sakawrhmuituai Sunset programme buatsaih a, kum hlui ni tla thlir liam tum a nih thu a sawi a. Mizoramah kum hlui thlaha tourist hip thei turin ruahmanna siam a ni tiin, Mizorama khualzin tam zawk hip luh an nih theih nan Mizo thil ngaisang a, lawm a, chawi lar zel turin thalaite a chah.
LMF 2025 tawp zanah hian Lunglei High Powered Committee (HPC) Vice Chairman V. Malsawmtluanga leh Lunglei West bialtu MLA T. Lalhlimpuia te pawh an tel a ni.
LMF 2025 hi Tourism Ministry atanga sum hmuh Rs nuai 25 leh Mizoram sorkar atanga sum hmuh Rs nuai 25, a vaiin Rs nuai 50 bakah, sumdawng leh agency hrang hrang atanga tanpuina (sponsor) sum hmuh hmanga buatsaih a ni.