Aizawl: MPCC Vice President, Lawngtlai West bialtu MLA ni bawk, C. Ngunlianchunga’n Lai Autonomous District Council (LADC) inthlanpui neih turah a chuh dawn.
December 3-a LADC inthlanpui neih turah chuh tur hian mi 82-in hming an pe lut a, hengte hi endik nghal niin, inthlan chuh tuma hming pe lut zingah hnawl an awm lo va, pawm vek an ni.
LADC inthlanpui neih tur chuh tuma hming pe lut zingah hian MPCC Vice President, Lawngtlai West bialtu MLA ni bawk C. Ngunlianchunga pawh telin, Lawngtlai Vengpui-ah Congress ticket-in a ding dawn a ni.
C. Ngunlianchunga hi MDC-ah tum eng emaw zat a tling tawh a, CEM pawh a lo ni tawh thin a, Congress kaihhruai sorkarah term hnih minister a lo ni tawh bawk.
Inthlan chuh tum zingah LADC CEM ni lai N.Zangura chu a bial ngai, M. Kawnpuiah a ding leh dawn a, CEM hlui V. Zirsanga pawh independent in Paithar bial-ah a ding dawn a ni.