Carlos Alcaraz chuan ATP Finals-ah Lorenzo Musetti a hneh a, kum 2025 chu World No. 1 ni chungin a thlah liam thei ta a. No. 1 ni chunga kum a thlah liam vawi hnihna a ni.
September thlaa US Open final-ah khan Alcaraz hian Jannik Sinner a hneh a, hei vang hian kum tawpa World No. 1 ni tura rin kai ber a nih phah a. Sinner-a hian China Open, Vienna Open leh Paris Masters title te a lak zui ve leh avangin kum tawpa a chungnung ber ni tur hi rin thiam a harsa leh ta hle a, ATP Finals-ah Spanish hian dinhmun a siam nghet ta chauh a ni.
Kum 22 mi, Spanish tennis star hi ATP Finals-ah hian a che tha hle a, Lorenzo Musetti nen an inkhelh pawh hian a chungnung hle a, harsa lo takin 6-4, 6-1-in a chak.
Alcaraz hi kum 23 tlin hmaa kum tawpa World No. 1 vawi hnih ni thei pahnihna a ni a, hetiang hi tennis player ropui bera tia sawi thin, Roger Federer leh Rafael Nadal te pawhin an tih theih loh a ni.
Kum 2025 hi Alcaraz-a tan kum tha a tih loh theih loh va. Kum 2022 ah khan World No. 1 ni chungin kum a khar tawh bawk a, kum 1973 hnua World No. 1 ni chunga kum khar thei naupang ber a lo ni tawh a ni.
Kum tirah khan Australian Open-ah Alcaraz hian quarter final a thleng a, he inelna chiah hi tournament lian thama a la champion lohna a ni a. Kum 2025 chhungin nomawi pariat a la thei a, Grand Slam-ah French Open leh US Open a la bawk.
Monte Carlo, Rome leh Cincinnati-ah ATP Masters 1000 nomawi a la a, Rotterdam, Queen’s Club leh Tokyo-ah te ATP 500 nomawi a la bawk a, season khata nomawi a lak hnem ber a ni.
Grand Slam nomawi vawi hnih a lak khan Open Era bikah Bjorn Bjorg hnua nomawi paruk la leh thei hmasa ber a ni a. Alcaraz ang bawkin Bjorg pawh khan kum 22 a nihin hetiang hi a lo puitlin ve tawh bawk a ni.
French Open final-ah Sinner nen an inkhel a, darkar nga leh minute 29 chhung zet an inkhel a, he tournament bika inkhel rei ber record an siam nghe nghe a, a tawpah Alcaraz hi a chak hram.
US Open-ah set khat chiah a hloh a, clay, grass leh hard court-a champion vek thei naupang ber niin, hetiang hi a hmain Djokovic, Nadal leh Mats Wilander te chuan an lo puitlin tawh a ni.