Kumin November 15 thleng khan Aizawl district chhunga police station hrang hrangah thubuai 1,593 ziah luh niin thubuai ziah luh atanga za zela 66 chu rukruk leh in rawk thubuai a ni.
Thawhtannia Aizawl SP Zosangliana, IPS., hova SP, Aizawl office-a Aizawl District Crime Review Meeting-a tar lan a nih danin kumin November 15 thleng khan Aizawl DEF hnuaia police station hrang hrangah thubuai 1,593 ziah luh niin, heng zinga thubuai 897 (56%) chu chin fel tawh a ni a. Thubuai 431-ah hnuchhui hna kalpui mek niin chhuichhuah loh thubuai 264 a awm bawk.
Thubuai ziah luh atanga za zela 66 hi rukruk leh in rawk thubuai a ni a. Kumin a thubuai ziah luh, court-in a chin fel tawh atanga za zela 90-ah dan bawhchhetute thiam loh chantir an ni a. Bawngkawn Police Station-ah thubuai ziah luh a tam ber a, kuminah thubuai 578 ziahluh a ni tawh.
Kum kal mekah Aizawl district chhungah thubuai lian tham zingah tualthah (murder) thubuai pakua ziah luh a ni a, heng thubuaite hi chhuichhuah vek an ni.
Naupang kumtlinglo pawngsual leh hurherhna lamhawia pawikhawih thubuai 60, POCSO Act hnuaiah ziah luh a ni.
Ruihhlo zuartu leh ruihhlo eng emaw zat mana thubuai siam a ni a. Kum kal mekah ND&PS Act hnuaiah thubuai 30 awm tawhin, dan bawhchhia mi 28 man an ni tawh bawk.
Ruihhlo chi hrang hrang heroin, methamphetamine, ganja leh crystal meth eng emaw zat man niin heng ruihhlo mante hi Rs. vbc 39.21 man hu a ni.
Police station hrang hrangin ILP endik an kalpui thin a, ILP nei lova Mizorama lut leh ILP dik lova khawsa, non-Mizo mi 793 man an ni tawh bawk a ni.
Aizawl District Crime Review Meeting-ah hian Addl. SP (Crime), Aizawl District, Sub-Divisional Police Officer (SDPO) te leh Police Station a Officer-in-Charge (OC)-te an tel a ni.
Thu sawi dangte:
- Aizawl district chhunga dan leh thupek kenkawh kawnga hmalakna tihchak a pawimawh thu sawi a ni.
- Aizawl khawpui chhunga Police Station hrang hrangin zana patrolling an neih thin chu chhunzawm a, tun aia effective zawk a kalpui zel a tul thu sawi a ni.
- Ruihhlo dona kawngah theihtawp chhuah a ruihhlo zuartute manchhuah kawngah tun aia nasa zawka hmalak a tul thu sawi a ni.
- Ruihhloin a tihbuai, khawlaia vak leh hmun ualau laia drug addict awmkhawm thinte chu enzui a, a tul dan a hmalak chhunzawm zel a pawimawh thu sawiho a ni bawk.
- SP, Aizawl chuan ILP checking nasa lehzual a hmalak a pawimawh thu a sawi a. Sairang thleng rel a rawn luh tak avangin Mizoram pawn atanga khualzin leh hnathawk a inhlawh tura rawn lut an pun thute, an la pun belh zel tura a ngaih thu leh heng thilte avanga ILP checking leh a enforce hna chu khauh zawk a kenkawh a pawimawh thu a sawi bawk.
- Sairang Railway Station a Police duty indah mek bakah an tha tichak turin dahbelh tum a nih thu a sawi a ni.
- Krismas leh Kumthar hunpui lo thleng turah mipuitin ralmuang taka an hman theih nan Aizawl District chhungah dan leh thupek kenkawh kawngah nasa taka hmalak a pawimawh thu sawi a ni.
- Boruak thianghlim hnuaia mipuiten hunpui an hman theih nan halpuah leh halmawi zawrh leh hal khapna thupek kenkawh kawngah nasa lehzual a hmalak a tul thu sawi a ni bawk.