Khawpuiah lirthei tlanchhuak a tam zel a, traffic jam a nasa leh tan hle. Hei hi kan enfel thuai a nih loh chuan hunpui kan hmachhawn mek thleng hian a nghawng chho dawn niin a lang, tanlak a ngai hle.
Lirthei a pung zel a, kawngpui zauh ngaihna a awm si lo. Kan lirthei tlan dan hi felfai zawka a chinfel dan kan zawn thuai thuai hi a ngai a ni.
Kan sorkar pawh hian a enkawltu traffic police lam hi thuam chak lehzual se la, khaw en lai phei chuan kawngsir phal lohna hmuna lirthei ding mai mai thleng hian manin, dahsawn hmak hmak ngam teh se.
Chutiang tur chuan traffic police lam pawh thuam chakin, a tul a nih chuan hmun dang ami pawh pawt nasa mai se la, hunpui thlenga lirthei che vel vil hneh tur hian thuam chak thuai teh se.
Tun atangin lirthei kal dan a buai a, kawngpui khawi hmun pawh a inhnawhkhat nasa tan hle. Hei hi chinfel vat vat a tul khawp mai. Traffic police hotu sang lam atang pawhin an naute chetla hi thlir uluk lehzual thei se la, an indaih lohna laiah phei chuan puitu tur thlengin indah zung zung thei se, kawngkama hmanrua leh lirthei hun lohna tur hmuna hung thlengin hma la huai ngam lehzual mawlh se a duhawm hle.
Sorkar hian chung lam atanga a ngaihven ran a, a thuam chak ran pawh a ngai hle bawk awm e.