Aizawl: ZPM President Lalliansawta leh Dampa bial by-election neih zawh taka ZPM candidate Vanlalsailova ten an party chak loh chhanah mawhphurtuah an inngaih thu an sawi.
Thawhtannia ZPM party-in an party pisa-a chhung inkhawm an neihah ZPM President Lalliansawta chuan, Dampa bial by-election-a an chak loh dan kha mawng sawh dawta tla chu an ni lo tih sawiin, “Polling station 41-a 20-ah kan sang zawk a. MNF khan 18-ah chakna an nei a. Hmun pakhatah kan inhneh tawk a, a vote number-a chhut a nih avangin kan tla a ni mai. Chuvangin, kan hneh lo lem lo a ni,” tiin, an chak loh chhanah puh tur an awm a nih chuan party president-in mawh a phur thu a sawi.
LADC inthlan tur chungchang sawiin Lalliansawta chuan, “December 3-a inthlang turin kan inpuahchah mek a, boruak pawh a sang viau. Candidate set pawh a buaithlak a, search committee dinin kumin kum tir atang khan hma kan la tawh a, mi tha tak tak 25 kan thlang chhuak ta hi a lawmawm hle,” tiin, Lai mipuite chu ngaihtuahna fim tak hmang se a duh thu sawiin, state sorkar behchhana sorkar siam tura chahin, state sorkar nena hrui khat vuana an tan tlak a tul tih hriaa, ZPM candidate te lo vote theuh turin a ngen.
Dampa bial by-election neih zawh taka ZPM candidate, Vanlalsailova pawhin thu sawiin, an chak loh avangin tute emaw mawhpuh kual tur a zawng lo va, a chhan bul ber chu amah a ni tih a pawm thlap thu a sawi a, an chak lohna chu inhmuh chhuah nan Pathianin malsawm se a duh thu leh politics-a an hlawhchhamna chuan Pathian hmel tibal lo se a duh thu a sawi.
Vanlalsailova chuan, an party-in an thil tum an tihhlawhtlinna turin tuna a dinhmun chu darthlalang atan Pathianin a hungah a ngaih thu leh theihtawp chhuaha Mizoram tan hma a lak zel tur thu a sawi bawk.
Inkhawmah hian Dampa bial by-election campaign committee Chairman, ZPM party Vice President ni bawk C. Lalnunnema pawhin thu a sawi.