Aizawl: Dampa bial by-election-a an tlin avanga MNF party-in Pathian hnena lawmthu sawi inkhawm, Thawhtannia Vana Pa Hall-a an buatsaihah MNF President Zoramthanga chuan ZPM candidate chak lohna hi ZPM party chak lohna leh chief minister chak lohna a nih thu a sawi.
MNF president chuan MNF-in an duhtawk ni lovin Pathianin a duhtawk a pek thin avangin Pathian hnenah lawmthu an sawi tih a sawi a. Dampa biala ZPM candidate chak lohna hi ZPM party chak lohna leh chief minister chak lohna a nih thu sawiin, “Bana kaih policy hnawlna a ni. Hei hi Pu Rama sawi ni lovin, Pu Duha sawi a ni,” a ti.
Chief minister hlui chuan, Article 371 (G) hre chiang ber anga inchhal hian a pawi lai ber Mizoram himna leh neitu an nihna hralh a, hriat ringawt a lo tawk lo tih sawiin, “A thlaraua chian a ngai a ni. Chuvangin, Ephraim ngawpui indonaa Absaloma a tlawm ang khan Pathian duh loh zawng titute nen kan indo a tul dawn a. Thlamuang leh chhel takin i awm ang u,” tiin, ‘Pathian leh kan ram tan’ an tih hi Pathianin mal a sawm dawn tih a sawi.
Dampa bial MLA atana thlan tlin, Dr. R. Lalthangliana, MNF Sr. Vice President pawhin thu sawiin, “He hnehna hi Dr. Thangtea hnehna a ni lo va, Pu Zoramthanga kaihhruai MNF hnehna a ni a, chu hnehna chu Pathian vang a ni. MNF hruaitu, party mite leh bial mipuite thawhrimna piah lamah, Pathian vang liau liauva hetiang dinhmuna ding thei hi kan ni a. Pathianin chawimawina sang ber chang rawh se,” a ti.
Dr R Lalthangliana chuan Zoramthanga kaihhruaina hnuaiah MNF hian Zoram hmasawnna ruhrel lian leh pawimawh zawng zawngte a lo thawk tawh thin tih a sawi a. Hun khirh leh thim tak tak an lo paltlang tawh a. Zoramthanga hi Pathian mi a nih vang a ni a. MNF dintuten, Pathian leh kan ram tan, thupui an lo vuah chu tun thlengin Lalpan mal a la sawm tih a sawi.
Inkhawmah hian Lalrintluanga Sailo kalsan tak, a nupui, Lalbiakthuami MNF Vice President Vanlalzawma bakah MNF Treasurer leh Campaign committee vice chairman Lalruatkima te pawhin thu an sawi.