- Vanlalnuntluanga Renthlei
Kan Chief Minister zahawm takin Darzo lui tui pump chhoh a, Darzo khaw bula tuidah khawl a, gravitation a tui luanthlak tir a , 2400 Mw Hydro Power Plant siam chungchang a sawi ka hriat tirh khan ka phu zawk a, 2400 Mw power plant kan neih chuan a va tha dawn em, chupawh luipui ngai lo leh nghal, Mizoram mamawh bakah Mw 2000 vel kan hralh thei ang a, kan intodelh bakah ram tan hausakna tham a ni dawn a, tiin nuam ka lo ti ve em em a ni. Mahse kan ngaihtuah chiang deuh a, hmana Tuipui lui khuah an sawi thin lai khan 450 Mw vel chauh kha a pek chhuah tur an sawi thin kha niin ka hre si a. A pui ka tih em em chu, kan CM meuhin Tuipui lui tui aia a let tam taka te zawk, Darzo lui, Saibu balu lakna bul lawka Tuipui fintu lui te, zan lama len denna tawk vel lek khan 2400 Mw pechhuak thei tur Magic a rawn hria hian ka rilru a tibuai em em a ni.
Engineer ka ni lova, High School kal lai pawh a mathematics a pass ve tawk tawk thin ka ni a, Computer lam lah Sorkar hna ka thawh ve chhung zawng a Operator te tel lova engmah ti ve thiam lo ka ni bawk si a, ka zan mu thei lovin kan ngaihtuah thin a,ka rilru a tibuai tawlh tawlh mai bawk si. Ka phone atangin thiam leh thiam lovin Chat Gpt ah lut ve in ka kawm ve chhin a, ka zawhna te Chat Gpt in min chhan dan hian min tibuai zual em em mai a, min chhanna ka hriatthiam dan tlangpui, Zopa in an hriatthiam tura ka ngaih angin kan dah chhuak ve chhin a, in buai ve em? Lo en teh u .
- 2400 Mw turbine khawl, a chung feet 1000 (300 m head) vel atanga khawhvir tur angin kan chhut tir vel a, a tui volume mamawh tur zat chu second khatah 906 M3 a ni. Hei hi kan hriatthiam theih nan, LPK / SK motorin tui, a body rualin phur ta ila, trip 302 kha second khat hman tawk vel a ni ang. Hetiang anih chuan nikhat, darkar 24 chhungin tui trip ( LPK/SK body rual ) trip 26100000, (78.3 million M3) a mamawh ang.
- Nikhat ( darkar 24 ) a hman khawp chauh tui dah khawl nan hian tui khuah (reservoir), a bang feet 30 (10 mtrs) a sangin siam ta ila , Buh tin 1936 (783 Ha) a zau a mamawh ang. Hetiang tiat tuikhuah siamna tur ram rem tha hi Darzo bul velah a awm turah ngai ila, hei pawh hi Nikhat tla tur chauh anih avangin a aia tam dah khawl kan duh phei chuan, a thuk zawng hi tih belh viau a ngai ang.
- Tui dah chhoh nan hian solar pump hman tur anih thu kha CM sawi kan hriat kha a ni a, tui pump chhoh nan hian Solar energy hi nikhatah, ni sat lai hi darkar 5/6 vel chauh anih avangin a chhut a buai thlak deuh a, amaherawhchu nikhata kan tui mamawh hi a san em avangin leh solar energy kan neih theih chhung darkar a rei loh avangin solar energy sang tak, kan hydro power plant in a siam chhuah tur aia tam, 2666 Mw emaw, a aia sang emaw kan mamawh dawn a ni. Hei hian ka rilru ala tibuai zual ta deuh deuh.
- Tui pump nana kan mamawh tur 2666 Mw pe chhuak tur a solar Module kan mamawh tur hi a rapthlak, Ram Tin 15000 (6000 ha) hmun ram a khuh vek a ngaih hmel bawk, Solar module man tur chauh hi Rs 1,05,00,00,00,000/ – vel ngai turin min chhut chhuah sak hem mai. Hei phei hi chuan ka lu a tina ta hial!!
Thil dang mamawh tur, tuikhuiahna tur te, pipe a chhunga Sial kaih theihna tur vel a liante, a khawl pui ber tur Turbines man te, Building te, Distribution station te leh a dang te chu ka chhut kual tir peih ta lo mai. Ka chhut kual tir zel chuan kan Chief Minister thu sawihi ka awih lo tak ngial dawnin ka hria a, Chat Gpt zawk hi a dik lo a ni ang tiin sleeping pills ka hmawm a, tui takin ka mu zui thei ta.