Adviser to Chief Minister (Finance) TBC Lalvenchhunga, MLA-in adviser to Chief minister a nihna atangin bânna a theh lut a, Chief Minister Lalduhoma’n a pawm loh thu a sawi thung.
Thudawn danin Thawhtanni khan Aizawl West I bialtu MLA, TBC Lalvenchhunga’n adviser to chief minister a nihna atangin bânna a theh luh a. Bânna a theh luh rual hian a lirthei kawl pawh a hlan nghal nia sawi a ni.
Bânna a theh luhah hian TBC Lalvenchhunga chuan legislator a nihna anga a mawhphurhna hrang hrangte a hlen chhuah theih nan leh ZPM party tana hma a lak tam zawk theih nan adviser to chief minister hna a chelh chu a bânsan mai tulah ngaiin, chief minister hnenah bânna a theh lut nia thudawn a ni.
Hetih lai hian Thawhlehnia MLA atana Dr R Lalthangliana lak luh inkhawm zawhah thu thar thehdarhtuten Chief Minister Lalduhoma chu Adviser to Chief Minister TBC Lalvenchhunga’n bânna a thehlut nia sawi chu a dik leh dik loh an lo zawt a, chief minister chuan a bânna chu a pawm loh thu a sawi a ni.
TBC Lalvenchhunga hi Aizawl West-I bialtu MLA a ni a; chief minister-in adviser panga a neih zinga pakhat niin finance chungchanga chief minister puitu, adviser to chief minister (finance) a ni mek a ni.