Aizawl: Chief Minister Lalduhoma kaihhruaiin Assam Rifle chhuahsan ram hman zui dan tur ngaihtuahtu advisory committee chu a tum li nan Thawhlehni khan an thukhawm.
Chairman chuan committee hi mipui huapzo committee a nih avangin an thutluknate hi mipui huapzo thutluknaah an ngai a. Committee-ah chuan a tam zawk duh dana kal thin an nih angin, an thurelte hi an zavaia kutthlakna a nih thu a sawi.
Advisory committee hian an thutkhawm hmasa lamah AR ram chhuahsana mi mal leh pawl, pass neite chu an pass neihte sorkara hlan tura ngen an rel a. Mi mal leh pawl hnenah ngenna an siam zui a. An ngen angin mi thenkhat chuan an ram hi sorkarah an hlanlet tawh a ni.
AR biak in hmun bik hi YMA Writ Petition chhunga mi nia sawi a nih avangin committee hian court thu an la ngaichang.
Canteen kuala Hari Mandir humhalh leh hman zui theiha dah tura Mizoram Gorkha Sanchalan Samiti, Bazar Branch ten Prime Minister hnena lehkha an lo thehluh tawh chu hnukkir tura ngen turin advisory committee chuan an thutkhawm hmasa lamah NGO Coordination Committee a ruat a. Nimina meeting-ah NGO Coordination Committee chuan an hmalaknain rah tha a chhuah ngei an beisei thu sawi.
Tun hnuah AR ram chhuahsan hmunhma leh building hman dilna lam chi chu committee-ah chhawpchhuah tawh loh ni se an ti a. An thu lo tihtluk tawh anga hmasawnna hnathawh turte chu a remchan danin sorkarin lo thawk zui tawh se, an tih bakah a hmunhma tihhmasawnna hna nodal department atan UD&PA chu an ruat a ni.
Committee hian committee kalphung mipuite hnena sawi fiahna thuchhuah siam ni se, an ti bawk.