Khawvel hmun hrang hranga a movie chan ‘Wicked: For Good’ tilar tura thawkchhuak mek Ariana Grande chu Singapore-ah lo tihbuai niin, a tibuaitu hi man nghal a ni a, court chuan ni 9 chhung jail tang turin a ti.
Media thenkhata tarlan danin Grande-i lo tibuaitu hi Australia mi Johnson Wen,26 a ni a, mipui zing atanga lo chhuakin Ariana Grande hi a lo kuah a, phal loh dana a khawsak miau avangin Singapore court chuan ni 9 chhung jail tang turin a ti ta a ni.
Singapore-a Wicked movie thar tilar tura an kal laiin, November 13 khan Ariana Grande hi mipui zing atanga lokal chhuak Wen chuan a lo kuah thut a, thuneituten an pawt hrang nghal thuai a ni.
Thlalak hrang hrangah a lang nghal a, official programme a nih miau tawh avangin a darh chak nghal hle a, he thil a thlen lai hian Grande-i pawh hi a hamhaih hle niin a lang.