Barcelona President Joan Laporta chuan an khelmual, Camp Nou-ah an player ropui, Lionel Messi lim din a tum thu a sawi.
Kum 38 mi Messi hian Spain-a Argentina team a zawm hmain sawi lawk loin Barcelona khelmual a tlawh a. Social media-ah a thlalak a dah chhuak a, thlalakah bakah hian thu ziak a dah tel a, “Barcelona player ka nih laia ka tih tak loh, inmangtha hun hmang turin ka kir leh,” a ti.
Laporta chuan, “Messi tan Barcelona hian hriat rengna buatsaih a phu em em a, khawvela ropui ber buatsaihsak hi kan tih awm tak a ni a. Board of director te mai bakah a teammate te nen pawh kan sawi thin a, Messi tan hian thil ropui deuh, eng emaw tak hi chu tih ngei kan duh hlawm,” a ti.
Barcelona youth academy La Masia chungchang ziahna lehkhabu tlangzarhnaah Laporta chuan, “Camp Nou-ah hian Messi lim hi din ngei tulin ka hria a. Ladislao Kubala leh Johan Cruyff te pawhin Camp Nou pawna lim an neih chuan Leo pawh hian a neih ve ngei hi a tul tlat. He club hming tilartu player ropui a ni chiang em mai a, kan chawimawi let hi a tul,” a ti bawk.
Vawi riat Ballon d’Or dawng thei Messi chuan August, 2021 khan suma an tlak chhiat avangin Barcelona a chhuahsan a. Barcelona-ah kum 21 a awm a, he mi chhung hian nomawi 34 zet mai a la hman a ni.
Covid hripui len lai a nih avang khan Barcelona tana game khel hnem ber leh goal thun hnem ber Messi chuan mumal takin inthlahna thu a sawi thei ta lo a. Tun hnuah a lo suangtuah anga Barcelona a chhuahsan tak loh thu hi sawi chhuakin, hmanniah khan inmangthana hun chu hman a tum thu a sawi chhuak ta a in.
Messi lim din chungchangah Laporta chuan, “Tunah hian Messi lim din chungchangah hma kan la dawn a, an chhungkaw remtihna lak hmasak a ngai a. Hun tha kan neiha design kan nei a nih chuan hma kan la vat ang a. Club thuneitute chu kan lawm viau dawn a, Barcelona player ropuite lim awmna hmuna a awm ve chuan kan club tantute pawh an lawm hle ang,” a ti.