Aizawl: Health Minister Lalrinpuiin Mamit district-a hman tur Mobile Medical Unit Van chu MINECO-a a pisa atangin nimin khan a vai liam.
Mobile Medical Unit Van hi TATA AIG General Insurance Company Ltd leh Swasti – The Health Catalyst-te CSR atanga fund a ni a. Tata Yodha Pick up hi Rs. nuai 12 man niin, damlo enna khawl X-ray leh test chi hrang hrang enna bungrua Rs. nuai 26 chuang hmanga thuam a ni a. MFM chu implementing agency niin, NHM nen tangkawpin mobile clinic hi neih thin a ni ang.
MMUV hi Mamit district-a doctor leh damdawi in awm remchan lohna khaw hrang hrangah a tlan kual dawn a, doctor, nurse leh medical staff-te nen khaw hrang hrangte hi an fang kual thin dawn a ni.
Health Minister chuan MMUV hmang hian thingtlang kilkhawr leh damdawi in pan harsatna hmunahte awlsam zawkin mipuite an inentir thei dawn tih a sawi a. He project-ah hian regular health camp telin, hei hian natna awm thei ven kawngahte, counselling leh damdawi in lian zawka a hun taka in-refer nan te a tangkai tur thu a sawi a. Mipuiten hriselna kawnga sorkar scheme hrang hrang an hmelhriata, mi tam zawkin hamthatna an dawn theih chu he project thil tum a nih thu a sawi bawk.