Tun pathianni khan Sairang rel station bula vai passenger ILP checkgate paltlang lova chhuak lai thlalak chu social media-ah a darh chiam a, mipui ngaihven a hlawh hle. Social media atanga ngaihdan tam berah chuan ILP hi mizo mipuiin kan ngaih pawimawhzia a lang chiang khawp mai. ILP tel lova vai lo lut hi kan zavai hian kan duh lo tak zet tih a lang.
Kan ram mipui hian kan ram himna, kan hnam himna hi kan vei takzet a, khawvel ram hrang hrangah a neitu ni lo, hnamdang an luh tam avanga buaina chu mizoten kan hmuthiam ve a. Chuvangin he ILP dan hi kan himna kulh mizote chimralna lak ata min veng himtu a nih kan hai lo. Tuna Mizoram bika awm mizote hi nuai 14 pawh kan tling tha thum lova, kan thlang lawka vai a tama tam mai hi chhuah zalen ngam an ni lo a ni. He dan hi khauh taka lekkawh reng a ngai.
Inner line permit hi a pe chhuaktu kan sawrkar a ni a, pekchhuahah hian keimahni liau liau mawhphurhna a ni. Mipuiten he dan humhalhna tur hian ILP enkawltute hi kan thlawp that a ngai bawk.
A permit pechhuaktute hian an permit pekchhuah hi eng angin nge vaiho hian an zawm, an permit nun hunchhung bak an cham khawtlai em tih hi an vil zui a ngai a, thawktu indaih lohna avang hian vil theih loh chin an nei ang. Chulaiah tak chuan mipui kan pawimawh ta a ni.
ILP pekchhuah leh enzuiah hian tih tak takna nena kan thawh a ngai a, veng tin leh khawtina mipui, a bik takin thalaite hian kan mawhphurhna a ni tih hria ila, Central YMA pawhin branch hrang hrang hnenah he mawhphurhna hi a pe tawh a, Central YMA thu hi branch tin ten mahni area-ah bawhzui bawk ila. Tin, vai cham khawmuang an awm leh awm loh hi report pekna online a tih mai theihna te pawh hi kan siam a ngai ang.
Kiltinah he dan lekkawh danah hian mitinin beng chhiin, keima hna a ni tih hre rengin, hnam ral theihna a venghimtu kan ni thei a ni tih thinlung puin mizote i harh thar nawn fo ang u.