Election Commission chuan Thawhtanni khan Assam-a special revision of electoral rolls kalpuina tur thupek a chhuah a, Booth Level Officer (BLO)-ten in tin lutin finfiah hna an thawk ang.
Hetih lai hian Special Intensive Revision (SIR) kalpui mekna state-ah chuan an duh loh thu an sawi mek a, SIR-ah hian voter zawng zawngten vote nei thei an ni tih tihchianna tura mamawh lehkha an thehluh vek a ngai a ni.
EC chuan Assam Chief Electoral Officer hnenah lehkha thawnin electoral roll ennawn hi January 1, 2026 atanga chhiar tan turin a ti a, hemi nia kum 18 tling chuan vote an nei thei dawn a ni.
Ruahman dan chuan BLO-ten in tin lutin November 22 atanga December 20 chhung finfiahna an kalpui ang a, draft electoral roll chu December 27-ah tihchhuah a ni ang a. Sawisel duh nei tan December 27 atanga January 22, 2026 inkar hun hawn a ni ang a; February 2, 2026 thleng chin fel zui niin final roll chu February 10, 2026-ah tihchhuah tur a ni ang.
EC thutlukna hi Assam Chief Minister Himanta Biswa chuan fakin X-ah “Assam sorkar chuan ECI-in special revision of electoral rolls a kalpui tur hi lawmawm a ti a. Hei hi khua leh tui dik takten vote an neiha electoral roll dik zawk a awm theihna tur a ni,” a ti.
October 27 khan Chief Election Commissioner Gyanesh Kumar-a chuan state pakua leh union territory pathuma SIR kalpuina tur a puang a. Nakuma assembly inthlang tur, Assam- tel a ni lo va, a chhan an zawhnaah chuan National Register of Citizens (NRC) an kalpui zawh tep vang a nih thu sawiin a hrana tih turin an ruahman tih a sawi a ni.
SIR hi duh lo pawh Assam-ah hioan vote neite chu BLO-in an inah tlawhin house number, hming, EPIC number, address leh tul dang zawng zawng an tihsak vek dawn a ni.
June 24 khan EC hian SIR kalpui tur puangin inthlan hmabak, Bihar-ah kalpui hmasak ber a ni.
September 30-a zawh felah vote nei 6% paih an ni a, hei hian sawisel pawh a hlawh a, a bikin eptu, Congress-in an sawi nasa a. A hnuah Chhattisgarh, Goa, Gujarat, Kerala, Madhya Pradesh, Rajasthan, Tamil Nadu, Uttar Pradesh, West Bengal, Puducherry, Andaman & Nicobar Islands leh Lakshadweep-a kalpui tur a puang leh a ni.