Aizawl: Mizoram sorkarin small hydel project pasarihte mi dang kut hlan (outsource) a tum chu ram leh mipui tana pawi thei tak a nih avangin kaltlangpui lo tur leh sut turin Congress party chuan an sawi.
Thawhtanni khan MPCC PAC member TT Zothansanga, MLA hlui chuan Aizawl Press Club-ah thu thar thehdarhtute a kawm a. Mizorama hydel project atangin Congress party-in kum 22 ro a rel chhungin Mizoramin power MW 83.05 a siam chhuak a, PC party-in kum nga ro a rel chhung 2.05 MW a thar chhuak a, MNF-in kum 17 ro a tel chhungin 15.5 MW a lo siam chhuak tawh a. Tun sorkar erawh hi chuan power-ah hnuhma an la nei lo va, power minister-in MW 38 chauh an la siam chhuak anga a sawi chu thu dik zan lo tih a sawi.
TT Zothansanga chuan sorkarin hydel project tenau mi mal kuta hlan a tum thenkhat zingah Serlui ‘B’ SHP atangin kum 10 chhungin Rs. 1,29,53,98,000 thar chhuah niin, a senso zat chu Rs. 51,39,97,407 a ni a, sorkarin a hlep zat chu Rs. 78,14,00,593 a nih thu a sawi.
ZPM sorkar hnu, kum 2023-24 angin chhutin kum khat thar chhuah zat Rs. 18,05,98,500 niin sorkar chan tur (32%) Rs. 5,77,91,520 a ni a, Kundan kum khat hlawkna Rs. 12,28,06,980 a ni a, kum 25 hlawkna Rs. 3,07,01,74,500 (32%XKum 25) chu Mizoramin kum 25 chhunga a hloh a ni thung tiin, heti chunga mi dang kut hlan an duh tlat chu mak an tih thu sawiin, “Kan hotute hian hlawkna an tel ve ta mai emaw tih awl tak a ni,” a ti.
Maicham Phase I-ah pawh hian hlawkna chu sorkarin a hmu tih a sawi a. Kundan Green Pvt. Ltd te hian he Project atang hian 15% chauh Mizoram a pe dawn a, a bak 85% chu anmahni chan tur a nih thu a sawi a. Zaa 85 lei let tur hi a man an ti pung ngei ngei dawn avangin Mizoram sorkar ta a nih laia an senso aiin a tam dawn tih a chiang thu a sawi bawk.
TT Zothansanga chuan, an hriat danin ZPM sorkar hian kum 2024 tir lamah Kundan Green Pvt Ltd te inleng an nei a, anni hian April 2024 vel khan, hydel project tenaute hi an lo survey vek tawh a, inhlan thei dinhmunah an din laiin MPCC president-in a sawi chhuak ta si a, inhlan mai ngam ta lovin, mawi hnai taka kalpui zel anih theih nan, competitive bidding awm thei turin, Kundan Green Pvt Ltd te hi tinzawn chungin tender te pawh an chhuah leh hnuhnawh nia an hriat thu sawiin, “He thil hi chu kan ram leh hnam tana thil pawi thei tak anih avang hian kan sorkar hian kaltlangpui lo hram se tih hi kan duh dan leh ngenna a ni,” tiin, hydel project tenaute hi tihral loh hrim hrim nise tih hi ramin a thatpui tur zawk nia ngaiin, sorkar hotute hian outsource lo hram se tih hi MPCC chuan an ngen tih a sawi.
“Congress hian ram ro kan siam thin a, MNF lo lanin an tichingpen thin,” tiin MPCC PAC member chuan, ZPM an rawn lang a, Lengpui Airport leh ZMC dehral an tum nghal a, a hnuah Tourist Lodge, Chaltlang te, Jordan Centre, Sethawn te, tunah SHP pasarihte outsource an han tum leh ta a. Infrastructure dintu – Congress, tichhetu – MNF, dehral hlir ngaihtuahtu ZPM te an awm tih sawiin, an neihsa te chu humhimin hralh lo hram turin sorkar an ngen tih a sawi bawk.