Congress chuan December chawlhkar khatnaah hian Delhi-a Ramlila Maidan-ah electoral roll Special Intensive Revision (SIR) kalpu duh lohna liantham tak lantir an tum.
Vantlang punkhawmna lian hi an party-in ram puma ‘vote ruk’ chungchanga sorkar an puhnaa anmahni tantu lam signature campaign an zawh hnua huaihawt tur niin signature vaibelchhe nga chuang an la khawm a ni.
SIR kalpui mekna state 12-a PCC president, CLP leader, general secretary, in-charge, secretary leh hruaitute thutkhawm chu Thawhlehni khan neih niin Congress President Mallikarjun Kharge-a’n a kaihruai a. Lok Sabha-a Leader of Opposition Rahul Gandhi leh General Secretary (Organisation) KC Venugopal-a te pawh an tel.
An thutkhawm zawhah Kharge-a chuan Congress party chuan electoral roll nihphung chu hum tlat turin thu an titlu a, tihdanglam tumna chu an do zel dawn tih a sawi.
Election Commission-in ‘SIR a kalpui chu a pawi tak zet’ tih a sawi a. “BJP hlimthla hnuaia kalpui a ni lo tih sawi ngawt a theih loh va, danpuia inthiamna leh India mipuite laka an intiamna kan hre chhuak,” a ti.
Congress chuan BJP hian vote rukna hmanrua atan SIR hi an hmang nia an ngaih thu Kharge-a chuan a sawi.
Kharge-a hian an party worker leh block leh district level-a office-bearer-te chu thil dik lo tihna awm palh thei laka inring reng turin a chah bawk.
“Chutiang tih tum chu kan puang chhuak zel dawn a, vote nei dik tak paih tum emaw, a nei thei lo telh tum emaw pawh kan hai chhuak zel ang,” a ti a. “Congress party chuan eng thil emaw hmang suala mipui rorelna kalphung tihchhiat tumna chu kan ngawihpui dawn lo,” a ti.
Venugopal-a pawhin Election Commission chuan mi thenkhatte vote paih a tum niin a sawi a. “SIR kalpui tum dan hi chu tute emaw tum bik neia vote paih a ni,” tiin entir nan Bihar-a lo kalpui tawh chu a sawi.
SIR chu dan pangngaiah thla ruk atanga kum khat chhung kalpui a nih thin thu sawiin. ‘tuna mi erawh hmanhmawh takin thla khat chhungin tihfel’ a nih thu a sawi a. Kerala, Rajasthan leh Madhya Pradesh-a Block Level Officer (BLO) thenkhat phei chu hnain a nawr nasat lutuk avangin an intihlum hial niin a sawi.
Venugopal-a chuan Kerala-ah phei chuan tual chhung rorel khawl kalpui inthlan kalpui mek a ni a, a thawh khatna atan December 9-ah vote thlak a ni dawn niin a sawi.
“Kerala assembly chuan SIR kalpui hun sawnna turin thu a titlu a. Kerala Chief Election Officer pawhin CEC hnenah an state-a SIR kalpui chu a hun rih lo tih a thlen a. BJP tih loh political party zawng zawngin hei hi an phut a ni bawk a; mahse, Election Commission chuan engmah a ngaihthlaksak lo va. BJP leh Narendra Modi-a duh dan vekin thil an kalpui tih a chiang a, hei hian mi barakhaih hle a ni,” a ti.
“Vawiin hian Kharge-a leh Gandhi-a ten PCC-te chu Election Commission-in thil tih a tum dan chiang takin an hrilh a, chu chu kan bei dawn a. Election Commission-in thil an tih tum dan hi mipui rorelna leh eptu party-te thiah tumna a ni a. December chawlhkar khatnaah hian Congress chuan SIR chungchangah hian Ramlila Maidan-ah punkhawm kan huaihawt ang,” a ti.