Aizawl: High Court chuan Aizawl leh Lunglei Road inkar kawng siamna Rs 58,99,00,000 a rang thei ang ber a hmang turin a ti.
JC Lalnunsanga, Supreme Court Advocate-on-Record-in a website-a a tar lan danin, November ni 18, 2025 khan Aizawl to Lunglei Road PIL chu high court-in a ngaihtuah leh a. Lunglei Thalai Pawl tana ding thubuai theh luttu ukil lam hian he court order, September 24, 2025-in a tih anga sorkarin November 7, 2025-a an affidavit thehluhah hian Rs 58,99,00,000 an hmanna kimchang tar lan a ni lo a ti a.
Court chuan sorkar affidavit-a sorkar chuan an theih ang tawka kawng siam thu te leh Rs 58,99,00,000 chu hman phalna, October 16, 2025-ah hmuh chauh a nih avangin pawisa la hman a la nih loh thu sorkarin an sawi chu ngun takin a ngaihtuah a. Sorkar ukil lamin kawng siamtu tur tender an chhuah theih tep thu a sawi a. Rang taka hmalak chhoh zel an tum thu court hi a hrilh.
Court chuan sorkar chu khaw that laia a rang thei ang bera, tha taka kawng chu siam turin a hriattir a. Kawng siamna tura pawisa pawh a hmanna tur ang thlapa hmang turin a ti bawk.
He case hi chawlhkar li hnua ngaihtuah leh turin leh sorkar chu an hmalakna tawhte court hriattir turin a ti a ni.
He thubuai hi PIL No. 12 of 2022, Lalduhawma Pachuau Vs State of Mizoram & Ors-ah hian thubuai thehluttu, Lunglei Thalai Pawl tan hian JC Lalnunsanga dingin, sorkar tan hian Mary L. Khiangte a ding a ni.