Heroin hawng 440 neitua puh, Henry Lalbiakzinga bail dilna chu Special Judge, ND&PS Court in a hnawl.
March 13, 2025 khan Hruaikawn kawnga Zokhawthar Police-ten heroin hawng 440 an man a, a neitu ber nia puh, Henry Lalbiakzinga thubuai chu a la kal mek zel a, Henry Lalbiakzinga hian Special Court, ND&PS Act. Champhai Judicial District hnenah bail a dil a, a dilna hi November 17, 2025 khan Special Court, ND&PS Act, Champhai Judicial District chuan a ukil leh sorkar ukil-te thusawi a ngaihtuah hnuah bail a dilna hi a hnawlsak a ni.
Henry-a ukil-te hian Henry-a kut atangin dan phal loh thil engmah an man loh thu te, a hriselna a that loh thu te, man a nih laiin BNSS Section 47 leh 48-in a phut anga man a nih chhan hrilhhriat a nih loh thu bakah a chhungte leh a laina hnaite pawh hrilh an nih loh thu te hmangin bail an dilsak a ni.
Hetihlai hian sorkar ukil-te chuan Henry-a hi he thubuaiah hian a inhnamhnawih ngei nia a lan thu leh amah an mannaah dan bawhchhiatna a awm loh thu an sawi ve thung a; Henry-a hi thiam loh chang thei dinhmuna ding a nih avangin thubuai ngaihtuah a nih laia lo chhuah lailawk chu a rem loh thu an tar lang ve bawk.
Special Court, ND&PS Act. Champhai Judicial District chuan sorkar ukil-te thu sawi chu pawmpuiin, Henry-a hi thubuai ngaihtuah a nih lai chuan jail-a la awm rih turin thutlukna a siam a. ND&PS Act. Section 35 leh 45 hnuaiah Henry-a hian hre reng chunga dan phal loh ti anga ngaih tur a ni tiin, bail a dilna hi a hnawlsak ta a ni.