Kan sawrkar chuan Mizorama power siamchhuahna hmun tenau pasarih chu mimal, vai company hnena enkawl turin tender a chhuah a. He tender hi Mizoram a Congress party chuan an dodal thu press conference neiin an puang thung.
Power siamchhuah hi thil namai a ni lova, sum leh pai a hek piah lamah ram zau tak tak a eichhia a, hun kal tawhah Congress sawrkar laiin chief minister Pu Lalthanhawla chuan ram a tih chhiat tur ui chung chungin kan ram hi power a kan intodelh loh chuan power man hi vairamah kan vawm liam hnem lutuk a, keimahni ngei hian kan siam a ngai a ni tiin Mizoram hmun hrang hrangah theihtawp chhuahin a lo siam a. Hydro electric power siamchhuak turin sum hman a tam avangin state sawrkar pawhin a retheih phah hle. UT sawrkar kan nih lai pawh khan chief minister Brig T Sailo pawh khan hydro project hi a lo buaipui nasa tawh a. Mahse, rambuai avangin a duh angin hma a la thei lo zawk a, hlawkna la tel tam lo mahse kan ramin a kan chhit leh hman chu thui tak a phuhruk tawh a ni. Ram chhungah mimal tam tak eizawnna pawh heng hydro project te hian a siamin eizawnna tha leh tangkai takah mipuiin an hmang a ni. Vai company in enkawl ta se hnathawk lai chawla eizawnna chan tur pawh an tam hle dawn bawk.
Kawng hrang hranga kan chan tur en hian a pawi em em a, kan rama kan siamsa power siamchhuahna chu a hlawkna vaiho tel turin kan pe ang a, kan mipuite eizawnna kan chhuhsak ang. Power a mumal lohin thuneihna kan neih tawh dawn loh avangin kan ngawi tawp mai dawn. Mahni ramah vaiho eizawnna leh hlawkna siamsaka thuneihna hlan ringawt pawh hi vawiin nia naupangte hian an la ngai haw hle dawn a ni.
Ram hruaitu hmasaten ram ro an lo buatsaih hi tha taka enkawl a, cheibawl a, kan ram tan hlawk taka hman a tul a. Chumi zawnga ngaihtuahna kan sawrkarin a hmang ta lova, vai company hnena enkawl tura hlanchhuah tum phet mai hi ram tan a pawi hle.
Kawng leh lamah chuan kan sawrkar hian ram hruaitu hmasate thil lo ruahman hi a sawi chhe nasa em em a, kan CM hian hruaitu hmasate hi a haw hle nia ngaih theihin thu a sawi thin a. Hetiang a nih avang hian hruaitu hmasate thil tih hrim hrim hi a duh lova, nuai reh a tum emaw tih mai turin hma a la a, central lama BJP in a hma a hruaitute hming nuai reh tuma a bei mekte pawh hi a entawn emaw tih mai a awl.
Ram ro hralh zawnga ke pen hi ralna dik tak a ni a, airport hralh an sawi a, mipuiin an duh lo chungin hma an la lui ngar ngar maite hi ram hmelma chezia a ni. Kan rama hralh theih apiang an hralh zel dawn a nih chuan roreltu dinhmun atanga lak sawn vat an ngai ngei dawn bawk a ni.