Aizawl: School Education Minister Dr Vanlalthlana chuan technology an hman tangkai thiam chuan ram pumin hma a sawn dawn tih a sawi.
SCERT Courtyard-ah State Council of Educational Research & Training (SCERT) buatsaih, ni hnih awh tur, EduTech Fest & Career Fair 2025 chu Nilaini khan School Education Department minister Dr. Vanlalthlana’n a hawng a. Technology an hman tangkai thiam chuan ram pumin hma a sawn dawn tih sawiin, “AI leh technology hmang thiam chu an dinchan dawn avangin hemi mila zirna her rem a, mahni intuaihriam a ngai,” a ti.
Literacy rate sang mah se, thiamnain a um zui loh chuan awmzia a awm loh thu sawiin Dr Vanlalthlana chuan, “PARAKH (Performance Assessment, Review, and Analysis of Knowledge for Holistic Development) exam-ah Mizo zirlaiten state danga an zir rualpuite an tluk loh hle avangin tan lak a ngai,” a ti.
Minister chuan World Economic Forum chhut danin, kum 2030-ah AI chuan khawvel pumah hna maktaduai 85 a luahlan ang a, hna thar maktaduai 97 vel a siam dawn tih a sawi a. AI nen hna an inchuh dawn avangin, tunlai mil thiamna – digital literacy, communication skills, financial literacy, leh tourism thang zel dawnsawn nan social skills leh hospitality – lam bawh zel turin leh, mahni kutkawiha ding thei, mi rawih ni lova mi ruaitu, hna zawngtu ni lova hna siamtu ni tura inpuahchah thiam zel turin zirlaite chahin, sorkar pawhin chutianga kaihruai thei turin hma lak zel a tum tih a sawi.
He huna khualzahawm, MYC Chairman Malsawmzuala Ralte, Lunglei West bialtu MLA T. Lalhlimpuia leh Dr. Lalduhawmi Thomte, Joint Director, SCERT-te’n thu an sawi bawk.