Aizawl: Chief Minister Lalduhoma’n sorkar hnathawk zinga hnathawk tlak lote chu special pension scheme hmanga pension pek a, hnathawk thei ngeite lak mai chu sorkar duh dan a nih thu a sawi.
Secretariat Conference Hall-a Home Department leh UD&PA department hnathawh dan thlir letna, review meeting Nilainia a hmanpuinaah chief minister chuan department hnathawh dan thlir letna chu an dik lohna zawnna a ni lo va, kalphung leh tihdan tha zawk an neih theih nan te, hmasawnna hna chak zawka an thawh theih nantea inrawnkhawmna a nih thu a sawi.
Chief minister chuan sorkar hnathawkte chu an ngaihdante tlang taka sawi tur leh inpawh taka meeting nei tur leh, service review committee nei rang tura chahin, sorkar hnathawk zinga hnathawh tlak lote chu special pension scheme hmanga pension pek a, hnathawh thei ngeite lak mai chu sorkar duhdan a ni tih a sawi a. Pisa kai hun ngai pawimawh tur leh officer-te chu an hnuaia thawkte welfare ngaipawimawh reng turin a chah bawk.
Home leh UD&PA changtu minister, K. Sapdanga pawhin chief minister hmalaknaah lawmthu a sawi a. Review Committee chuan thawktute a tiphurin thawhhona pawh a that phah thu a sawi.
Home department bik hnathawh thlir letnaa tar lan a nih danin Manipur leh Mizoram inrinaah police outpost pariat a awm mek a, Assam nena ramriah outpost 22 a awm a, ramri buai chungchanga official level meeting neih leh hun tur duan mek a nih thu te, Mizoram leh Bangladesh ramri thui zawng hi km 318 angin MHA chuan a chhinchhiah a. Mizoram police station paruk awmin BSF duty post eng emaw zat a awm thute tar lan a ni.
Tunah hian Myanmar atanga Mizorama raltlan mi 31,214, Bangladesh atanga raltlan mi 2,354 leh Manipur atanga raltlan mi 6,953 chhinchhiah mek a nih thu te, kumin July atang khan Myanmar leh Bangladesh atanga lo lutte biometric enrolment (Foreigner Identification Portal) kalpui tan a ni a. Myanmar atanga rawn lut hi zaa 58.15 ziah luh tawh an ni a, Bangladesh atanga rawn lut zaa 10.84 ziah luh tawh a nih thu te, Free Movement Regime hnuaiah border pass pek thin niin, October 30, 2025 thleng khan border pass hi 21,238 pek tawh a. Pass hi hmun pathum Zokhawthar, Hnahlan leh Zochachhuahah te pek chhuah a nih thute leh sorkarin Indo Myanmar ramri venhimna tha tak avangin ruihhlo leh dan lova kuhva lakluh a tla hniam nasat thu tar lan a ni bawk.
UD&PA department hnathawh thlir letnaah Aizawl Sustainable Urban Transport Project hmangin Aizawl leh a chhehvel inkalpawhna kawngpuite nasa taka tihhmasawn tum mek a nih thute, Thenzawl Peace City Master Plan, Neihloh khaw thar Master Plan, Khawzawl Master Plan leh Saitual Master Plan te siam mek a nih thute tar lan langsar zualte an ni.