Nigerian venhim hna thawktute chuan an ram hmarthlang lam, Kebbi-a boarding school atanga mi sualten hmeichhe zirlai 25 an ruk bo zawn hna an thawh chhunzawm zel a, he thil thleng hian an ram puma himna derthawnzia a pho lang hle bawk.
Police chuan silai kengten Thawhtanni zing dar 04:00 (India-a zing dar 08:30) velah Maga khuaa Government Girls Comprehensive Secondary School chu motorcycle-a thlengin ruahmanna fel tak neiin an bei tih an sawi.
A beitute hi police nen pawh an inkap hmasa a, sikul chu hual zuiin zirlaite hi an hruai ta a ni.
“Naupangte hi kan zawng hmu ngei ang, fing tak leh fel takin um zui an ni a, hlawhtlinna kan chang ngei ang,” tiin Chief of Army Staff Lieutenant General Waidi Shaibu-a chuan Thawhlehnia Kebbi a tlawhnaah sipaite hnenah a sawi.
Zirlaite ruk an nih mek lai hian Nigeria hi US President Donald Trump-a’n Islamist hel pawl, Islamic State West Africa Province (ISWAP) leh Boko Haram-ten Kristian an tihduhdah nasat avangin sipai a tir lut mai thei tia a vau me laia thleng a ni.
Nigeria hmarchhakah hian hel an tam a, mi ruk bo hi tun hnaiah hmarthlangah a tam thar a, ram lailiah ran vulhtu leh lo neitute intihbuaina a chhuak nasa bawk.
ISWAP chuan kartawpah khan an fighter-ten army general ru bovin an that tih an sawi a, hei hi Nigeria-in hel a beihnaa hlawhchhamna lian taka ngaih a ni.
Tual chhung chanchinbute chuan Thawhtanni vek khan Kebbi ramri, Zamfara-ah mi sual pawlin hmeichhia leh naupang telin mi 64 an ru bo bawk niin an tar lang.
Maga-ah hian naupang nu leh pate chuan an fate dama hmuh leh beisei takin an nghak a. Boko Haram-in kum 2014-a Chibok hmeichhe naupang 300 chuang an ruk, khawvel pum nghawrtu ang kha a nih hlauhna a awm mek.
Hemi tum hian thenkhat an tlanchhuak a, kum eng emaw zat hnuah a rutute nen inrem siamin chhuah an ni a, thenkhat an kir tawh lo bawk.
Hemi hnuah hian sikul leh university zirlai eng emaw zat tlanna sum phutin ruk an ni leh tawh.