Aizawl: MZP chuan zirna sikul thenkhatin board exam result tha duh luat avanga zirlai hnufual an hnawl thin chu pawi an tih thu sawiin, hetianga harsatna tawkte an hnena inhriattir turin an ngen.
Nilainia MZP General Headquarters, executive committee meeting chu MZP Pisapui-ah neih a ni. MZP President Dr C Lalremruata kaihhruai meeting-ah hian sikul thenkhat board exam result tha duh luat avanga zirlai hnufual dropout an awm thin chu tha lo an tih thu an sawi a. Zirlai hnufual, thiam thei lo leh chhawmdawl ngai tak takte chhawmdawla kaihruai tu tur zawk ten, sikul result tha duhna avang ringawta zirlaite hma hun chhe tur ngaihtuah pui miah lova an hnawtchhuak thin leh sikul dang atanga board exam hmachhawn tura sawipui leh fuih an awm thin chu pawi an tih thu an sawi.
Hetianga harsatna tawk mek zirlaite chu an hnenah in-report turin MZP chuan ngenin, zirlaite harsatna chinfel pui turin an inpeih reng tih an sawi a. Hetiang ang harsatna hi zirlaiten tawk tawh lo se a duh tak thu an sawi bawk.
Meeting-ah hian Chawngte ‘P’ a Mizo leh Chakma inkhelhnaa buaina chhuakah, Mizo ten Chakma kut an tuar chu an duh lo tak zet tih an sawi a. Mizoram chhungah Mizo ten hnamdang kut an tuar leh thin chu pawi an tiin, Mizoram chhunga hnamdang chengte pawh fimkhur tur leh a ram neitu Mizote chu zah tura an hriattir a. Chawngte ‘P’-a thil thleng chungchang hi nimin chawhnu khan MZP chuan Mizoram Chakma Student Union-te MZP Pisapui-ah a sawipui a ni.
Zirlai harsate tanpuina tur Students’ Aid Fund, MZP-in a buatsaih chu meeting-ah hian guideline pharh niin, a pawm bawk.