Nitish Kumar-a chu kar hmasaa assembly inthlana a kaihhruai tangrualin hnehna an chan hnuah Ningani chawhma khan a vawi 10 nan Bihar chief minister atan Patna-a historic Gandhi Maidan-ah lak luh leh a ni.
Janata Dal United boss hian a upa tawh lutuk, thuneihna chang turin a fit tawh lo tia sawiselna chhangin an state inthlanah hian bial 243-ah bial 85 hnehna a chang a. BJP kaihhruaia an thawhhona, National Democratic Alliance (NDA) chuan bial 202-ah hnehna an chang.
Gandhi Maidan-a sorkar thar lak luh inkhawmah hian Prime Minister Narendra Modi bakah rorelna state-a chief minister eng emaw zat an tel.
Chief minister lak luh a nih rual hian BJP hruaitu – Samrat Choudhary, Vijay Sinha leh Dilip Jaiswal atanga bul tanin MLA 19 chu minister atan lak luh nghal an ni a. Choudhary leh Sinha hi Kumar-a thachhangdawltu turte niin Jaiswal-a hi revenue minister lo ni tawh a ni.
BJP hruaitu atangin Sanjay Kumar Singh, Pramod Kumar leh Lakhendra Raushan te lak luh an ni bawk a. Pramod Kumar-a hi a hmain law, sugarcane leh art & culture minister lo ni tawh a ni.
BJP atang hian Rama Nishad, Narayan Prasad, Surendra Mehata, Arun Shankar Prasad leh Sanjay ‘Tiger’ Singh te minister atan an luhtir bawk a. Anni bakah hian silai kah thiam, Commonwealth Games-a gold medal lo la tawh, kum 34 mi, a vawi hnih nana MLA, Shreyasi Singh chu an telh bawk.
Bial 89-a MLA nei, BJP atanga minister 10 an luh laiin JDU atangin paruk lak luh an ni a. Bijendra Prasad Yadav, Shrawon Kumar, Vijay Kumar Chaudhary leh Ashok Choudhary te an tel a. Yadav-a hi energy minister thin niin Kumar-a hi rural development minister thin, Chaudhary-a water resources ministry leh choudhary-a rural works development chang thin an ni.
Minorities welfare minister thin, Mohd Zama Khan-a a tel leh bawk.
Chirag Paswan-a kaihhruai Lok Janshakti Party, chief minister hlui, Jitan Ram Manjhi-a kaihhruai Hindustan Awam Morcha leh Upendra Kushwaha-a kaihhruai, Rashtriya Lok Manch te pawhin minister an nei theuh dawn a, LJP hian pahnih an nei bawk a. RLM leh HAM atang hian an boss ve ve fapate – Deepak Prakash leh Santosh Manjhi an ni.
Anni pahnih hi MLA ni lovin Bihar Legislative Council member an ni a. Prakash-a hi a vawi khat nana minister tur niin Manjhi-a erawh information technology leh disaster management a lo enkawl ve zawk tawh a ni.