Aizawl: Traffic Management-a Mizoramin Special Award a dawn lawm nan Zirtawpni hian City Bus chuan man chanve-in tlan tir dawn.
UD&PA Minister K. Sapdanga’n nimin khan a pisa-ah thu thar thehdarhtute kawmin, mipuiin traffic rules an zawm that avanga Mizoramin Special Award an dawn chu mipui thuawih vang, an zavaia thawh chhuah a ni tih a sawi a. Hei hi an lawmzia entir nan Zirtawpni hian Aizawl khawpui chhunga City Bus chuan man chanve-a tlantir a nih tur thu a sawi.
K Sapdanga chuan, City bus chuan man hi a thlawnin tih tum zet mah se, a buaithlak deuh a, City bus neitute nen an sawi ho hnuah thil buaithlak a awm avangin chuan man chanve-a tlan tir turin ruahmanna an siam a. A bak chanve dang chu sorkar department, UD&PA-in a tum sak dawn tih a sawi.
Minister chuan Special Award an dawn theihna tura rim taka thawktu traffic police pawh chaw chhun pek an tum tih a sawi bawk.